甜如日日情人節
我一向緊貼潮流脈搏，今次嘅「Paco巨星飯堂」同大家見面嘅時間，適逢係一年一度嘅情人節，我特別邀請到新婚3個月嘅「長腳蟹」呂慧儀（Konnie），同佢嘅Mr. Right黃文迪（Dickson）擔任「Valentine's Special」嘅嘉賓，同我去到位於九龍香格里拉酒店嘅米芝蓮星級推介餐廳「香宮」，品嘗星級菜式。
特別一提，Dickson婚後積極轉型，投身商界大展拳腳，努力為愛妻，賺錢建立屬於二人嘅家，甜蜜動力無限。對黃生黃師奶嚟講，真係日日都係情人節。
今晚我同黃文迪Dickson及黃師奶Konnie相聚，率先為佢哋慶祝婚後首個情人節。
新婚後傳統過年
最近盛傳去年11月同Dickson結束多年愛情長跑，拉埋天窗嘅「長腳蟹」Konnie有孕味。我就梗係要趁今次飯敍，請黃氏伉儷嚟一個真情表白啦！話口未完，Konnie就以行動證明自己未懷龍B，佢先呷一口夫婦二人特別為今次飯敍準備嘅「銀河鐵道」特別版冰酒，然後話﹕「之前有個小肚腩，個個就話我有BB，其實我仲未有，佢呀（一指Dickson)都暗示我要減肥，叫我唔好再現肚腩仔嘞。」
哈哈哈！話雖如此，我見Dickson一臉陶醉望住愛妻，就知Konnie所講嘅只係一個溫馨提示啦！而且Dickson亦隨即補充：「我哋都好鍾意小朋友，不過就未必要趕生龍B，依家趕之外，到小朋友大個啲，要同其他龍B爭學位喎，太辛苦嘞。」
酒一開，我哋呢個既溫馨又熱鬧嘅飯敍，隨即開始。
Dickson同Konnie向我送上特別版冰酒，非常有心！
Konnie邊聽邊點頭表示贊同老公，仲話暫時要享受二人世界，啱啱過去嘅農曆新年，夫婦二人就喺大年初一，返Dickson位於元朗嘅老家，向長輩斟茶拜年，Dickson話：「係呀，今年係我哋結婚之後第一年過年，一定要做啲傳統儀式嘅。（Konnie插嘴：「唔係啦！年年都要啦！」）哈哈！係呀！o氹咗佢斟第一年，之後要年年斟都ok吖嘛！」
黃氏夫婦二人外形極潮，點睇都唔似傳統之人，黃師奶Konnie藉今次飯敍澄清：「我不嬲都係一個傳統嘅人，結婚生B一直係我嘅夢想嚟o架。衣着性感只係純粹為做嘢，尊重番個場合啫。況且身邊呢一個已經係最好，就唔需要靠性感去搵其他嘅所謂更好啦！咁落去係一個無止境嘅追求，唔係我會做嘅嘢。」
哈哈哈！估唔到Konnie外表open，骨子裏咁傳統。Dickson就係型人一名，但係對愛妻都好體貼入微。「最近我日日為新劇《女警愛作戰》開工，佢（Dickson）有時嚟探班，搞到周麗淇好羨慕，係咁讚話：『你老公好好呀！』哈哈！都幾開心o架！」
今晚我哋品嘗嘅星級套餐，連甜品6道菜，每位$988，包括脆皮乳豬拼椒鹽田雞腿（左圖）、椰皇松茸竹笙鮮鮑湯（右圖）。
黃師奶冧談求婚
Konnie邊講邊流露甜到漏表情，雖然情人節當日佢要繼續為劇集開工，但Dickson都為此作好小小準備：「如果佢開外景都有機會去探吓班嘅，本來佢諗住喺屋企焗蛋糕同整朱古力，依家要開工就冇辦法啦！」
Konnie接口：「我想整蛋糕係因為先生（Konnie對Dickson䁥稱）最鍾意食蛋糕，哈哈！雖然今次整唔到，但係之後大把機會嘅。Paco，我之前冇講過，其實先生求婚嘅時候，都好窩心o架，先生你講吖。」
「吓？好唔型o架喎，你講啦！」
講起求婚過程，Dickson超級怕醜，Konnie就愈講愈開心！
經過「群眾壓力」，黃氏夫婦破天荒喺婚宴以外公開咀嘴，好sweet！
「哈哈！嗰日先生一早買咗戒指同999朶玫瑰，仲諗住煎牛扒同鵝肝，同我candle light dinner。本來我要開廠遲收工，但係後來就突然早收工，返到屋企就見到先生煎緊牛扒，平時佢唔煮嘢o架，我咁醒，見到咁嘅格局已經知道有景轟。
「之後我食咗少少佢煮嘅嘢，因為實在係比較難食，哈哈！又燶晒咁，佢就問我食唔食雪糕，仲要我自己入廚房攞喎，我就估佢放咗隻戒指喺冰箱，但係搵極都冇喎，點知一打開盒雪糕，就見到隻戒指喺個蓋入面。」
Dickson終於忍唔住插口：「我知道佢會搵雪櫃o架嘞，所以特登收喺盒雪糕入面，佢一見到嘅時候，我就攬住紮花，跪地同佢講：『我好愛你呀，你可唔可以嫁畀我？』」
「我即刻say yes啦！」Konnie今日轉述都一臉回味，真係羨煞旁人。
稻草骨以稻草扎五花腩，炆煮後特別清香。
乳酪玉簪螺片大蝦皇，集中外特色於一身。
夫婿轉型入商界
而Dickson喺婚前已經準備轉型，向商界發展，依家佢嘅公司啱啱起步，代理日本殿堂清酒品牌「上善如水」嘅美顏產品，佢仲親身試過產品先開始計劃市場推廣，「今次轉型係一個機緣巧合，之前我覺得自己唔係好適合喺娛樂圈發展，咁啱就有朋友同我講開呢set products，我試過之後都覺得真係有用，於是就同朋友夾份開公司。
「暫時嘅目標就係呢個品牌可以喺香港打響名堂，之後嘅嘢就要慢慢再plan。」
好！咁我先祝Dickson轉型成功，再祝福佢同Konnie日日都係情人節，甜過蜜，乾！
Dickson即席向我送上「上善如水」嘅護膚系列，呢支「神仙水」真係有清酒嘅味道，哈哈哈！
我哋同大廚莫師傅合照，由我嘅戰友之一何麗全擔任攝影師。
有愛妻Konnie甜蜜餵生果，Dickson一定冧晒！
甜品係四重奏：紫米金瓜椰子雪糕、鮮果串、燕窩香檳山梅奶凍同奶皇合桃酥（前至後），非常豐富。
