財爺也曾「激進」 仰慕民權悲劇英雄

財爺冇派錢畀「N無」，被政客指孤寒，唔肯幫最赤貧嘅市民，咁講對佢好唔公道，其實今年派出八百億，好多都惠及最基層市民。如果講「民粹」，其實鬍鬚曾嘅思想都幾受社會改革家影響，其中之一係六十年代美國激進黑人民權領袖Malcolm X。

最新一期《讀書好》月刊，訪問鬍鬚曾近排睇乜書，佢特別介紹一本傳記《Malcolm X : A Life of Reinvention》。Malcolm X在美國大名鼎鼎，六十年代領導黑人爭取平等，主張激進改革，結果遇刺身亡，成為大英雄。

陳淑莊最近又再大變身，成為港版Lady GaGa。原來娛樂網站goyeah.com搵咗佢做video blogger，化身「Lady渣渣」，玩寸時事，笑談豬狼鬥！

鬍鬚曾仰慕Malcolm X亦唔奇怪，佢老哥在MIT讀完建築師課程，轉咗去讀教育，當時滿懷理想，曾經去過最窮嘅黑人區做義工，見到黑人點慘法，認為馬丁路德金太妥協，Malcolm X就激進好多。佢後來做咗AO，到今日成為財爺，當然做嘢要保守穩陣，唔會用Malcolm X嗰套，不過佢對草根嘅passion，睇嚟冇變。

講開財爺會唔會留低，聽講佢冇積極爭取再做，但去意亦唔強烈，如果新特首真係斟佢，留低亦有可能。如果係咁，官場估計佢做政務司長嘅機會大啲。