為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2012 年 02 月 07 日

最低工資立法走靚位 振英哥「迷蹤步」邀功

跑馬仔提名逼近,雙英亦愈鬥愈烈,政圈最新預測,振英哥應夠票入閘,但可能只係「僅熟」,約百七票左右,同仁哥差唔多,唐唐牌面已擁四百幾張支持票,不過提名毋須晒到盡,估計三百票就夠。

振英哥亦知提名票少過唐唐好多,故近排更大力打「民望牌」希望拋離唐唐,除咗不斷用「激將法」迫唐唐辯論,製造對手「怯戰」形象,另一招係將市民受落嘅政府政策大挪移,攬上身歸功自己,同區議員宣傳「成功爭取」冇乜分別。

振英哥在最低工資立法問題施展「迷蹤步」,次次企喺最靚位置,最初緊貼政府,最近又話同政府對立,似足區議員「成功爭取」。

例如早前佢同仁哥上香港電台過招,講到過去政績,仁哥直攻其死穴,指佢做行政會議召集人期間冇為低下層做嘢,又冇批評政府決策,振英哥不愧詭辯高手,隨即反守為攻,話自己有為基層請命,如最低工資立法,就不惜同政府打對台。

振英忽然「工運鬥士」上身,講到好似一直同政府對立咁,一位了解整個決策過程嘅高官聽到眼都凸埋,忍唔住爆一句:「咁都得!」佢同小弟講,○七年煲呔已積極考慮落實最低工資,但因為影響大,商界亦有顧慮,唔可以一步到位,所以先在某啲工種實行工資保障,檢討成果後再謀後着。

佢話振英哥當時在行會內冇提出要立法,在報紙撰文評論最低工資,亦只係叫僱主調高基層員工薪酬,講法同政府冇乜分別。外界多以為煲呔唔會真係立法,只不過拖拖吓,振英哥亦係咁諗,所以其後又寫文表明唔認為現階段要立法,只呼籲私營企業「負社會責任」,用直接簡單便捷、功率高、少虛耗嘅辦法,提高基層人工。

煲呔○八年已準備最低工資立法,振英哥見到勢頭,至公開主張立法。

到咗○八年,政府檢討工資保障運動後,睇到基層員工薪水升幅有限,煲呔知道最低工資立法已難避免,有關高官隨即開始為立法做準備。呢個時候,振英哥可能摸到立法事在必行,突然轉軚,在當年四月於港台節目《左右紅藍綠》中,提出政府應立法規定最低工資,巧妙走位企咗去勞工界嗰邊。

呢位高官指,振英哥可能見到最低工資在基層有市場,初時公開同政府唱同一調子,跟到貼,罕有幫政府護航。後來見政府有意立法,就行先一步,搖身變為立法主催者。到最近,更加化身工運英雄,話自己一直不惜同政府對立,都要力爭最低工資立法。

政圈老友拆解振英哥招數,比喻為「迷蹤步」,每次都走到個靚位,企喺贏面最大嘅位置,然後施展大挪移,將政府好嘢算埋入自己條數,呢招的確高明,可用一字形容之:醒!

佢老哥標榜「成功爭取」已非首次,去年佢接受某雜誌訪問,就講述○三年老董委以重任,叫佢上京同領導人商討開放自由行,結果水到渠成。究竟實情係點?是否同樣係大挪移?好值得大家諗吓!