為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2012 年 02 月 10 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

傾力十卜

我身為電影人,對電影事事關心,所以我對黃真真導演、阿旦(鄭丹瑞)編劇嘅電影《傾城之淚》,亦相當留意。今晚我就邀請咗兩位精英電影人,聯同戲中其中一位男主角李治廷(Aarif),擔任今期「Paco巨星飯堂」嘅嘉賓,同我大談電影經。

當然,美食係今晚另一主角,我哋喺位於銅鑼灣嘅「Alba」,品嘗有心思嘅現代法國料理,講起電影就更加起勁啦!

今晚我同阿旦、Aarif、真真(左至右)聚首一堂,講食經、電影經,bravo!

傾城3淚

講《傾城之淚》,就不得不由導演黃真真出發,佢擅長以女性角度拍攝兩性為題材嘅電影,今次要拍真誠掛帥嘅催淚電影,真真都手到拿來,「電影公司喺落實開拍呢部戲嘅時候,『傾城之淚』已經係一早拍板嘅主題,因為佢哋認為市場上好耐冇出現過呢種愛情電影,諗住觀眾都好想入場釋放吓眼淚同情緒,所以旦哥就寫咗一個賺人熱淚嘅古仔。不過,其實呢個係好高難度嘅Project,要用一齣90分鐘嘅電影感動觀眾已經唔容易,而我哋仲要將劇本分咗三個細故事,每個古仔又只係用30分鐘去打動觀眾,其實係一個挑戰;但係身為一個導演,我好樂意每次開新戲,都可以咁challenging。」

Aarif(右)不斷多謝真真(左)嘅啟發,聽到阿旦(中)表情趣怪。

真真喺一部戲內用3種方式催淚,佢講起都興奮。

哈哈哈!雖然阿旦負責編劇,但係真真導演都有份同恩師阿旦一齊創作,仲流咗唔少真眼淚。「創作劇本嘅時候會喊,喺片場現場準備埋位又會喊,到後期嘞,搞配音同剪接嘅時候,我都會喊。咁我都係佢嘅創作者,梗係百分百投入o架啦。同埋拍完呢部戲,我自己都有新嘅體會,你話老土都好啦,我真係覺得要珍惜自己身邊嘅人,想再愛家人多一啲,因為戲入面三個故事都係講緊,冇幸福係必然嘅。」

之後真真再詳細講三個故事,仲以第一、二、三滴淚去鋪排,「第一滴淚係以Aarif同周冬雨為中心,因為Aarif患癌,佢只可以喺有限嘅時間入面追逐愛;第二滴淚係小齊(任賢齊)同Gigi(梁詠琪)做主角,講佢哋係舊同學,因為母校重建而重新走埋一齊;我覺得第三滴淚係一般大眾會容易啲有共鳴,因為呢個係一個關於兩個都市小人物嘅古仔,我哋搵咗竇驍同陳喬恩去飾演一對從事基層工作嘅情侶,為咗前途佢哋被迫分開,到個男仔終於有事業,佢哋又因為timing同其他問題,無辦法喺埋一齊。」

「Alba」提供定價套餐服務,由$888(4道菜起)。今晚嘅前菜係吞拿魚他他配草莓魚子醬,開胃!

小龍蝦生切薄片伴意大利瓜泡沫,係另一道有心思嘅前菜。

感同身受

除咗好似真真咁講,觀眾會容易有共鳴之外,阿旦話,其實第三滴淚係佢嘅親身經歷,「我諗好多年輕人,無論係邊個年代嘅都好,都有過類似嘅經歷。呢個古仔係我入行嘅時候,已經想寫嘅題材,但係嗰時人微言輕,邊有咁容易說服到投資者吖?咁啱要寫呢部戲嘅劇本,於是我就攞番呢個收埋咗30幾年嘅古仔出嚟,都仍然咁震撼。」

電影有阿旦嘅那些年,亦有Aarif嘅這些年,「我第一次見導演嘅時候,我睇完劇本,問咗導演一個問題,就係:『導演,點解你會搵我?』

我同資深電影人阿旦(右)、真真(左)講電影,一晚真係講唔晒。

「跟住佢解釋畀我聽,話我嘅角色係一個富二代,佢覺得我會鍾意,之後仲話我直情係富二代添!哈哈!不過,我真係好好彩,撞到咁好嘅導演,教我發揮演技同感情,做呢啲苦情角色,靠我自己嘅掌握,我真係驚會over-acto架!而且周冬雨亦係一個好好嘅partner,雖然年紀唔大,但演技已經好出色,我同佢好快混熟,所以好易入戲。

「講真o架,如果喺一年前,我絕對做唔到呢個身懷絕症嘅二世祖角色,我覺得自己進步咗好多。其實我真係好希望聽到大家對部戲嘅意見。喺最尾一場悲情戲,導演同我傾咗好耐,佢有嗰種power去將我心底嘅情緒谷出嚟,我咁大個仔都未試過咁激動!」

真真(中)說話表情多,連Aarif都不及導演多變,哈哈哈!

兩式鵝肝係由鵝肝凍批(前)、香煎鵝肝(後)組成,一次過試晒兩種口味。

慢煮鴨胸配蘋果蓉、谷古紅酒汁嘅鴨胸嫩滑,係戒食牛肉30年嘅阿旦所挑選嘅主菜。

香煎松露脆鱸魚伴白酒汁,白酒汁充分調出魚肉鮮味。

合作無間

哈哈哈!導演嘅魅力在於佢引發演員嘅情緒,真真嘅功力亦開始收放自如,而阿旦可以講係真真嘅伯樂,二人合作無間,由《女人那話兒》認識,到《六樓後座》開始合作,「旦真」的確為香港電影注入多元生命力。講起真真,阿旦話:「拍戲嘅嘢,賺唔賺錢我真係冇計,咁我哋賺咗拍戲囉,不停有人搵我哋開戲,如果依家要搵黃真真,起碼排隊排到2013年。」

而真真亦係一位我好欣賞嘅導演,我哋傾傾吓,不其然講到佢哋之前大獲好評嘅作品《分手說愛你》,真真解釋:「嚴格嚟講,《分手說愛你》係我第一部『催淚』戲,不過籌備過程一波三折,到最後我哋決定自己嚟(投資);到拍完、剪完到發行,都有啲公司睇完都話唔得嘅,所以部戲嘅成功,我好開心囉,因為令咗好多人跌眼鏡!我最想講,冇人知道一部戲嘅成敗嘅!」

講得好!我就係欣賞佢哋對電影嘅真誠!預祝真真嘅新作成功!乾!

阿旦(左)同Aarif(右)都係首次合作,佢對後輩亦相當支持。

我哋同餐廳老闆韓先生(後排右)及大廚Antonio(後排左)合照留念,現代法國料理的確係名不虛傳。

酥皮燒羊柳配松露薯蓉、黑椰菜特濃咖啡汁,有創意考功夫!

愛澱粉質人士可選擇自家製意大利粉配鮮蠔、魚子醬作主菜。

甜品日日唔同,今晚係千層朱古力批。

Alba

地址:銅鑼灣開平道1號Cubus 10樓
電話:2890 6693