向展威孝義傳兒子
一段由十五歲便開始的初戀，由分隔兩地，到修成正果，再孕育出愛情結晶品，的確讓人感到溫暖，相信愛是永恒。向華強的姪兒向展威便是當中的男主角。
擁有顯赫的家族背景、不羈的外貌，向展威卻比其他富二代更懂得「愛」、更懂得中國人的禮義廉恥、更懂得家庭的重要性，他說：「我同哥哥（向展邦）一家三口，仲有爸爸（向華光）媽媽一齊住，就算間屋幾大，條樓梯幾闊，都會撞到人，所以個仔細細個已經明白長幼有序呢個道理，識得尊師重道，最緊要識得遷就人！」
一個男人擁有美滿的家庭，以及忠誠的愛，其實比起事業有成、家財萬貫，更值得尊重！
向展威的兒子Darwin快將四歲，現就讀根德園幼稚園K1，除了是他和太太的心肝寶貝外，也是向家的寵兒。
識分尊卑
七十後的向展威，外表頗潮，意想不到地由髮絲到指尖都流動着傳統中國人的熱血，嘴邊掛着「禮、義、廉、恥」四字，事事講求禮儀、孝道，更無時無刻教育快將四歲的兒子浩駿（Darwin）要「說好話、存好心、做好事」，「我同哥哥（向展邦）一家三口、仲有爸爸（向華光）媽媽一齊住，就算間屋幾大，條樓梯幾闊，都會撞到人，所以個仔細細個已經識得分尊卑，長幼有序，仲好識遷就人；因為哥哥個女大佢七個月，可以講係同佢並肩成長，我哋成日教佢要讓吓女仔、就吓家姐，佢都會咁做，變咗佢好識得同人相處。我見我嘅朋友啲仔女會比較內向自我，又霸道鍾意搶嘢玩，但佢一早就識sharing（分享），我好開心佢心地好好，永遠唔會講啲令人唔鍾意嘅說話。」
向展威（左三）與胞兄向展邦（右三）於一○年底合作開設M.SPY模特兒公司，旗下組合Mi55更即將進軍樂壇。
正因為要培育兒子擁有優良的品德，向展威也特地為他揀選本地的幼稚園入讀，「唔想佢讀國際學校，好似會冇乜規矩咁；揀根德園，一來係佢嘅堂家姐都喺度讀啦，二來間學校較注重道德禮儀，傳統得嚟係內斂嘅。」因此，未來的升學之路，向展威也朝着本地學校進發，「心目中都有啲鍾意嘅學校，個仔依家讀緊K1，但太太已經好忙咁上網睇緊啲小學嘅資料，佢仲話聽講啲名校，過分注重學生要喺運動方面攞獎，變咗教學上面流於表面，好多學生放學後都要補習，我哋就唔會揀呢啲學校喇。一個小朋友返完學仲要日日去補習，咁咪冇咗喺屋企嘅家庭樂時間？會唔會逼得太緊呢？我哋之所以要大家庭一齊住，都係希望享受多啲家庭嘅溫暖啫，因為呢樣嘢係我哋傳統中國人最重視嘅嘢！」
