為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2012 年 01 月 10 日

青松觀道長扶乩 預言唐唐會贏

最近有道教人士創辦一份月刊叫《生活有道》,顧問皆是教內頭面人物,創刊號用咗前民政局局長何志平專訪做封面,睇嚟同道教團體有關。小弟翻閱內容,最吸引係一篇報道題為《香港首次!扶乩+占卜選特首》,如今「雙英」打到難分難解,戰情愈嚟愈激,呢個時候睇吓道長點預言,都幾有趣。

據文中所講,該刊特別去屯門青松觀,請道長扶乩求問新特首誰是真命天子,結果求得十六字真言,就係:「重新吸納,再次新機,希望這次,做得完美。」觀內道長解釋,乩文暗示未來特首參選前本在政府工作,當選後重掌政務,如能把握機會,可比舊職位做得更稱職。道長雖冇點名,但明顯係指唐唐。

香港著名道觀青松觀的道長扶乩問誰將是新特首,結果求得十六字真言(右小圖,原刊於《生活有道》),道長話乩文暗示未來特首本在政府工作,當選後重掌政務,將更稱職。雖然道長冇點名,但一聽就知係唐唐。

該刊又搵到一個玄學家訪問,呢位師傅叫梁善行,聲稱四年前分別為唐唐同CY批命盤,早已睇到前者勝算較高。佢話唐唐生於戊申月、庚辰時,「正官當令、庚金司權」,可取官印,五十三歲後歲運「藤蘿繫甲」,藤之特性是柔韌,可沿大樹攀升吸收陽光,所以總有勝算。

至於振英哥,呢位師傅就指佢命局本應功名顯赫,可作領袖,無奈食神星搖合着正官星,八字水火相剋,破壞了正官星,令功名受損,所以從商兼政對佢最有利。師傅依此預言,今次特首之爭,振英哥勝數較低。

扶乩占卜對跑馬仔的預測,純屬茶餘飯後的助興話題,大家毋須認真看待,最重要仲係睇「雙英」之政綱及領導政府能力,所以未來兩個月兩人勢將施展渾身解數,續有一番激鬥。

講開跑馬仔最新形勢,上周小弟出席一個小圍飯局,某政圈元老實牙實齒話收到風,振英哥將攞唔夠百五張提名票,入唔到閘,但某前高官睇法完全相反,話振英哥入閘應冇問題,結果兩人打賭一鋪,輸嗰位在六星級酒店設豪宴一圍,聽者有份。睇目前情況,小弟認為前高官贏面較大,所以加入前高官一邊,等食元老嗰餐。

有玄學家四年前為振英哥批八字,認為佢勝數較低。