為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2012 年 01 月 12 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

現代再遇經典

經典,一向係可一不可再。不過,有戲劇大師毛俊輝毛Sir嘅領導,佢嘅新派經典作《情話紫釵》,喺2010年公演後,現代話劇糅合經典粵劇,破格得驚為天人,今年載譽演出「再遇版」,班底依舊,情節更細緻。

我一向欣賞經典,所以誠邀毛Sir,聯同其太座兼《紫釵》演員之一胡美儀,及金馬影帝謝君豪,擔任今次「Paco巨星飯堂」嘉賓,細說《情話紫釵》二三事。

難得同美儀、毛Sir同君豪(左至右)相敍暢談,我哋先以酒會友!

名師組高徒班

今晚3位嘉賓分別係戲劇同粵劇嘅重量級人物,我特別挑選位於ifc嘅「H One」,同3位貴賓品嘗住高格調嘅西式滋味,大談戲、曲。

毛Sir貴為本地戲劇大師,桃李滿門,由黃秋生、詹瑞文、謝君豪,到蘇玉華、陳錦鴻、王祖藍,都係出自毛Sir門下,高徒各有成就,而毛Sir則永不停步,2010年《情話紫釵》嘅公演前,佢就號召咗另外兩名高徒莊文強同麥兆輝,為戲劇撰寫現代部分嘅文本。

「喺籌備過程入面,我嘅構思係將戲曲文豪唐滌生嘅名作《紫釵記》,糅合現代話劇,睇吓兩者可以擦出嘅火花。於是我揀咗入面其中3節,當中包括《花前遇俠》同埋最為人熟悉嘅《劍合釵圓》。之後我就捉咗麥兆輝同莊文強,幫我寫現代部分嘅文本,就成為咗呢部劇嘞。」

唐滌生不論對粵劇界,抑或係粵語文化界都影響深遠;毛Sir將經典crossover現代戲劇,魄力可嘉。

以美國頂級生牛肉薄片、火箭菜、鵝肝凍批配松露薄片($298)作前菜,夠開胃。

香芋牛油煎帶子伴西班牙火腿($218),creamy中不失清新。

毛Sir(左)即場送贈《情話紫釵》嘅特別版原聲碟,非常客氣。

慢煮法國鵪鶉、白蘆筍配松露薄片($398),肉嫩清甜。

毛Sir(左二)對戲劇嘅熱情歷久不淡,值得欣賞!

影帝樂撐師父

毛Sir以創意修飾經典,加上其超然嘅江湖地位,召集咗美儀、林錦棠兩位粵劇精英,加埋君豪、何超儀、潘志文、張繼聰、劉玉翠等戲劇實力分子,成就《紫釵》新繹。戲劇不論喺中、港都有超然成績,毛Sir梗係笑逐顏開,「我一直都好想為戲劇加添新元素,呢部劇喺香港公演『再遇版』,喺上海又得到『年度時尚戲曲』獎,係一種鼓舞。

「難得嘅係我哋喺中國演出嘅時候,都係以廣東話演出,我覺得藝術係無言語限制嘅,好嘅藝術,喺唔同嘅地方都會令人有感應。」

講到感應,就要請現代部分嘅男主角君豪講吓今次同師父合作嘅感受,「毛Sir係我嘅恩師,佢有作品搵我演出,我自然二話不說就應承啦!今次原班人馬有緣再遇,我一趕快完成中國嘅工作,就返香港會合團隊,毛Sir要求好高o架,入台之前,我哋一定要排到佢滿意,今次有幾場戲都有唔同嘅演繹,我要同超儀排熟啲。」

講到廣東文化,我同毛Sir(左)、君豪(右)交流甚多。

君豪(右)係影帝級人馬,加上出自毛Sir門下,佢都話同師父夾《情話紫釵》,依然獲益良多。

意大利大紅蝦扁長條麵配西西里番茄、歐芹及辣椒($458)做得不俗。

木石烤意大利野生鱸魚、菠菜及白酒蜆汁($328),魚同汁嘅配合得宜,相得益彰。

新法演繹粵劇

現代部分有君豪、超儀包辦,經典粵劇部分,就有美儀同林錦棠坐鎮,「今次毛Sir要求我要用心去唱每段戲,所以每次我都要出盡全力去感受霍小玉嘅心情,次次唱完,入後台換妝,我嘅眼淚仲係咁流,劇本真係好有威力。」

劇本威力之外,加上毛Sir、美儀夫婦同心,既溫馨亦擦出火花!我祝《情話紫釵》,good show!

酒逢知己,我同3位貴賓飲住傾!

美儀(左)謙稱,喺毛Sir(右)嚴格要求下,令佢對演繹粵劇有更深層嘅體會。

甜品係心太軟朱古力蛋糕配血橙雪芭($128),為飯敍畫上完美句號。

12小時慢煮西班牙豬腩肉、西班牙辣腸配香草芥末油醋汁($368),係用心加時間打造嘅成果。

松露野菌蘑菇湯($98),賣相似Cappuccino,味道鮮味。


H One

地址:中環港景街1號國際金融中心商場二期4樓4008號舖
電話:2805 0638

下期預告

帶陳奐仁歎海景,品嘗高級料理。