為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2011 年 12 月 27 日

泛民搞「四角擂台」 CY冷對 唔瞅唔睬

今年聖誕得十度,但「雙英鬥」愈鬥愈熱,兩個陣營都冇假放,馬不停蹄四出活動,最開心係傳媒,唔怕假期冇新聞。不過「雙英」對泛民主催的特首競選「四人大擂台」,就相當冷淡,特別係振英哥,一直唔瞅唔睬,冇厘反應,睇嚟唔想同仁哥基哥同台對打。

線人回報,泛民各路人馬上個月傾特首選舉,達成共識搞一次特首參選人論壇,搵晒唐唐、CY、仁哥、基哥齊齊上台,泛民兩個大佬當然冇問題,但「雙英」肯唔肯上擂台,就要問過至知。於是泛民特別叫湯家驊向兩人作出口頭邀請,唐唐初步表示願意,但形式要再傾,CY曾經表示可以諗,但到泛民決定十二月搞,湯再聯絡CY,佢老哥就一直都唔覆,結果論壇要延期。

泛民想搵齊四個參選人打擂台,振英哥一直冇覆,被指不想與仁哥基哥同台混戰,他則表示只是時間安排不到,並非避戰。

泛民唔死心,前周重提搞「大擂台」,再嘗試搵多CY一次,但結果亦係一樣,對方始終冇覆。當時有傳媒向CY查詢,他說並非迴避泛民邀請,只是時間問題啫,但有泛民中人認為這不過是藉口,他根本無意出席論壇,唔想同仁哥基哥齊上擂台,被泛民人馬圍攻。

CY避開唔同泛民大佬對打,但就力促與唐唐隻揪,盡快舉行一場「雙英」辯論,看來是想趁唐唐未完全熱身,便搶韁快去搶分,但唐唐方面亦知這類「擂台」不急於一時,故提出於明年二月報名參選後,做好晒成套政綱,才與CY公開同場較量。由此觀之,梁營現時之策略是不打大混戰,卻逼唐唐打單打,以至對論壇有兩種態度。

今次選委會選舉,泛民人士攞到近二百票,將來唐梁對決,選委每一票都咁重要,班友點投票,唔可以低估,所以江湖消息話梁營已開始向民主黨、公民黨及專業界選委發出友善訊號,試探能否拉攏部分選票,例如力撐CY的會計界議員陳茂波就搵過泛民會計界選委(有九票),希望拉攏班友過票,但對方已初步拒絕。

李永達認為CY與唐唐應面對泛民挑戰,不要只做「公關式」訪問。

政圈知情人士指,泛民二百票唔會一致行動,背後並冇統一指揮棒,因為有政黨背景的選委只佔一半,其他人可以有唔同取態,將來投票時點投法,現在好難評估。

唐營今次搵到民主黨前阿姐夏詠援加盟,以她在泛民之淵源及人脈,相信有助唐唐同泛民政黨(特別是民主黨)溝通。過往唐唐同班友一直有來往,關係唔差,起碼可以坐低傾,反而CY路數較難捉摸,所以泛民中部分人傾向唐唐多啲。政治講到尾是一場交易,今日如幫唐唐一把,如果他上到台,日後應有某種回報。