最近英國飲食權威雜誌《餐廳》（Restaurant），選出2009年全球100間最佳餐廳，而位於中環置地廣場嘅L'Atelier de Joel Robuchon更係其中之一。法國餐廳我都介紹過唔少，但係介紹咁出色嘅法國餐都係第一次。呢度無論環境、食物到賣相都係最高境界。咁啱今次我請嘅嘉賓毛志輝（Alan）曾經喺法國留學，嚟呢間餐廳真係啱晒。除此之外，我仲搵嚟同Alan合作無間嘅周汶錡（Kathy），同埋Alan好欣賞嘅側田一齊試菜。

飯局金句：名表美酒贈金牌（由Alan提供）

今晚我搵嚟名模周汶錡、名表代理商毛志輝，同埋側田，嚟到有2星米芝蓮推介，全球100佳嘅L'Atelier de Joel Robuchon，試吓呢度精緻嘅法國菜。頭盤先嚟一人一盒Oscietra魚子醬，食唔停口，亦都讚不絕口！

靚酒神仙棒

今次慕名而來嘅L'Atelier de Joel Robuchon，位於中環置地廣場4樓，一入到嚟我就被搶眼嘅紅色Open Kitchen吸引住，幾位廚師正喺度忙碌準備緊晚市，直覺話我知，我今晚會有好多好嘢食！呢間餐廳分為Open Kitchen同房內Fine Dining兩部分，推開房門，除咗見到精緻餐桌擺設，仲有個大花園，落地玻璃令食客無阻擋地邊欣賞中環夜景邊品嘗美食。因為食法國餐飲紅酒最夾，所以我今晚都入鄉隨俗。

Alan喺鐘表界好出名，上次喺側田出道3周年記者會上，好意外地佢送咗支水晶「神仙棒」畀我，今晚終於有機會等佢詳細講解一下支棒點用。「靚紅酒開瓶後要菍氣，呢支棒叫Wine Wand，由水晶製成，佢嘅作用係令啲酒可以breathe得快啲，將支棒放落杯酒等3分鐘，就可以飲。」Alan斟咗兩杯紅酒，即場示範畀我睇。果然，用咗神仙棒嗰杯，無論香氣同口感都好好，真係好神奇。原來Wine Wand係Philip Stein嘅最新出品，除咗紅酒同白酒，威士忌都用得！支神仙棒真係啱我，因為對於我嚟講，飲酒最緊要快，哈哈哈！點知Kathy呢個時候就話，「但係法國餐咩都慢慢嚟，飲酒都唔例外！」Kathy攞起今晚個menu同我講，「呢個tasting menu有10道菜，portion細細份，目的就係要令食客仔細品嘗食物嘅味道，飲吓酒，enjoy the dinner。」呢個時候，侍應就為我哋送上魚子醬，一人一盒，好矜貴呀！

大表面熱潮

食完頭盤之後，大廚入咗嚟同我哋打招呼，Alan亦都主動用流利嘅法文多謝佢為我哋炮製晚餐。「嘩！你啲法文好勁喎！」我說。「我12歲就畀家人『放逐』咗去法國讀書，之後先返嚟香港做嘢。」我問Alan點解從事手表行業，「當年我畢業之後，喺卡地亞做咗8年，珠寶首飾同手表都要兼顧。到我28歲，覺得係時候有自己嘅事業，而我覺得作為一個男性，賣手表會較為有說服力，所以就揀咗呢行。」

鐘表業喺瑞士係一個歷史悠久嘅工業，Alan能夠從中引入唔少大品牌，就全憑一個「勇」字。「我係第一個引入瑞士名表Franck Muller，當時我喺表展見到佢個檔位無人問津，但係啲表又好靚好創新，於是就膽粗粗入去問吓，將佢啲表帶嚟香港。」勇字當頭加上流利嘅法文，令Alan為香港手表界掀起一個大表面手表嘅熱潮，「當時我sell Franck Muller係畀人鬧㗎，因為大家認為戴靚表梗係Rolex啦，其實當時喺歐洲已經流行緊戴大表面手表。」時至今日，事實證明咗大手表已經成為潮流，就好似電視咁，人只會愈睇愈大，返唔到轉頭。

講到手表潮流，Alan話09年興一啲經濟又有質素嘅表，「除此之外，各大鐘表品牌都會面向祖國，因為內地人嘅消費能力的確好高。」唔單只鐘表業，我認為娛樂事業都應該視內地市場為第一位。

Kathy對Wind Wand十分感興趣，叫我飲威士忌嘅時候，不妨試吓。	Kathy唔只對着衫扮靚有研究，原來佢都好鍾情飲紅酒。佢話：「依家有埋呢支Wine Wand，咁就可以有更多藉口，約埋班朋友一路飲，一路玩。」

手表經理人

其實代理手表同做經理人一樣，最緊要係搵到一個有質素、有spirit嘅品牌，咁樣就可以令你嘅生意，佢嘅名氣一齊步步高陞。「我哋做手表代理，其實同管理artist一樣，可以幫佢創事業高峰，亦都可能要同佢一齊共度難關，但係Paco，我比你幸運，就係我嘅表唔會發脾氣，哈哈哈！」我敬Alan一杯，「我做每個artist，都會落足心機，幫佢哋攀上事業高峰！好似側田咁，我哋依家好努力向目標進發㗎！」

Alan都話佢好欣賞側田嘅音樂，「側田係一個好有潛質嘅藝人，聽得出音樂底子好深厚，Paco，你真係有眼光！」Alan不嬲都好支持我哋金牌大風，佢仲sponsor我旗下藝人嘅手表添。原來，側田同Alan唔只工作上有交流，私底下都經常見面，「係啊Paco，Alan都好鍾意打籃球同網球，我已經約埋佢，仲有小方嚟我度打波！」至於我同Alan，就梗係酒腳啦！哈哈！

Alan讚我揀人有眼光，其實佢揀手表同樣獨到，咁多年嚟代理嘅品牌不下數十個，而且所揀嘅最終都會成為大熱嘅潮表。「藝人最緊要係入屋，而手表亦都一樣，最緊要多人認同！所以無論係高中低價格嘅手表，我哋都會賣，照顧不同階層嘅顧客。」雖然飯局期間，Alan不斷叫我做師傅，我實在唔咁當，「Alan，我哋嘅合作係雙贏，我嘅artist戴你嘅表，更加有型，而你嘅表又可以成為潮流嘅icon，哈哈哈，我依家諗緊點幫你market呢支水晶棒呀！」

Alan送咗一隻黑白色嘅Philip Stein手表畀我，啱晒我平日型格、沉實嘅打扮。

Kathy貴為行內名模，不時會成為luxury brand的代言人。Alan經常搵Kathy為其代理的手表行show，皆因Alan認為Kathy的高貴最切合高級鐘表的形象。	側田同Alan唔單只工作上有交流，佢哋仲約埋切磋球技添！

L'Atelier de Joel Robuchon 地址：中環置地廣場4樓401舖 電話：2166 9000

註：以上介紹的tasting menu，每位$1,850，共10道菜，須一日前預訂。除本文介紹的8道菜外，還有餐前小吃龍蝦啫喱和甜品薄荷雪糕伴雜草莓沙巴翁。