李小加升呢 做霍大班鄰居
港交所（0388）行政總裁李小加今年六月以五千二萬賣出陽明山莊單位後，升呢轉住獨立屋，間新屋位於南區舂磡角道六十六號，望晒成個舂磡角海灘，保守估計市值要兩億幾。不過小加唔係買而係租，但租金一啲唔平，每月二十八萬八千銀，一年租金接近三百五十萬。
住得起咁嘅級數大屋，鄰居肯定唔小嘢，聽啲老友講，毗鄰嘅六十四號屋主，係和黃（0013）大班霍建寧。唔單止咁，原來李小加住緊間屋，都係由霍大班擁有，霍建寧喺九六年以四千二百萬買入，至今升值超過四倍。
側聞今次李小加租霍大班間屋，背後有一段古。話說李小加幾個月前開始喺南區搵樓，佢要求好高，睇過唔少樓都唔合心水，幾經轉折，終於睇中呢間舂磡角道獨立屋。不過間屋有人洽商得如火如荼，李小加原以為都冇望，點知負責帶李小加睇樓個經紀唔覺意透露咗業主係霍建寧，小加二話不說，主動出擊，直接搵霍大班洽商，最終租得心頭好。
