筲箕灣唐樓升值百五倍
早前一言跟老友去間新食肆午宴，餐廳入面用咗好多老香港圖片作為裝飾，有個賣樓廣告十分有趣，值得跟讀者分享。話說嗰則廣告係由間叫逢源置業嘅地產商刊登，時值一九六三年，筲箕灣逢源大廈剛開售，發展商為咗吸引買家，用一至十嘅數目字，度咗十大優點出嚟，都算幾有創意，例如甚麼一層新樓、二萬餘元、三全浴室……十分抵買等。
最教人注意係嗰個價，翻查資料，逢源大廈坐落地點位於筲箕灣道，嗰個年代筲箕灣冇地鐵，幢大廈位處電車路旁邊，算係區內地王；而且嗰時筲箕灣未填海，周邊啲樓又較矮，樓高十三層嘅逢源大廈可以遠眺海景，樓價係當年指標。
幢樓有一百九十八個單位，面積由三百四十至七百五十五呎，嗰時一個五百呎單位樓價係二萬一千零五十元，每呎約莫四十蚊；四十多年後嘅今日，樓價要三百二十五萬，升值足足一百五十三倍！
逢源大廈六三年落成，到今日樓價升逾百五倍。
