信和改骨灰龕做豪宅
舊年信和（0083）上水洋房Goodwood Park開售時畀啲惡爺敲竹槓，喺佢個樓盤對面整個骨灰龕場，兼且將副棺材放喺入面，目的好明顯，擺到明要脅發展商，想攞着數。起初信和企硬，後尾為免影響豪宅銷情，最終花咗近千七萬買咗幅地，較之前某財團出價高出一倍。
一言聽到，信和近日終向城規會申請，將幅地改為住宅用途，計劃興建三座面積分別約二千方呎洋房，今次真係陰宅變陽宅。聽啲地產界人士講，項目即使落成，估計市值都係六千萬，扣除地價及建築費，信和利潤有限，之所以高價收購，大家都心知肚明係迫不得已。
呢個骨灰龕前身係一個養場，原係上水鄉紳侯氏家族擁有，早年一直由從事殯儀行業嘅梁姓兄弟個老竇租用，但啲原居民對呢啲咁嘅地唔多理，又冇人收租，結果喺九五年反被逆權侵佔（業權人在一定時限沒有收取租金，租戶有權申請取得業權）搶埋個業權。梁家唔使一分一毫，就免費用咗塊地幾十年，然後仲據為己有，跟住又高價賣地，真係不得不佩服呢兩兄弟賺到盡。
信和最終屈服，用咗千七萬買入骨灰龕。
骨灰龕業主梁先生由霸地到高價轉售，分毫不出就套利千幾萬。
