模界人才輩出，要成功突圍，必須要有代表作。今晚金牌飯局兩位嘉賓：Juliana S.及Madi R.，都係模特兒行列嘅新人類，而且話咁快就有驚人嘅曝光率！因為兩位都係古巨基最新力作〈勁歌金曲3 Party King〉嘅MV內，有精采嘅演出，成為「古女郎」，為佢哋嘅銀色旅途，踏出成功第一步。

我帶兩位生力軍，到位於中環嘅「Via 28 Ristorante」，一邊品嘗有特色嘅意大利菜，一邊向Juliana及Madi了解佢哋遠走他鄉尋夢嘅故事。

我帶Juliana（左）及Madi（右）兩位「古女郎」到中環品嘗意大利菜，試菜前我哋碰杯慶祝！

大讚古導

Juliana同Madi不約而同為基仔獻出MV第一次，雖然之前佢哋各自有廣告演出嘅經驗，但係講到MV演出，兩位靚女都係一張白紙，佢哋歸功於導演之一嘅基仔，臨場指導得宜。Madi話：「Leo（基仔）好nice，佢知道我未拍過MV，會同我哋傾偈relax，等我哋唔使咁緊張。

「另外，佢嘅要求都好高，亦都會同我哋詳細解釋個故事，拍呢個MV，我學咗好多嘢。」

至於Juliana，就早喺基仔前一個MV〈爆了〉，首次擔任MV女主角，「Leo教識我面對鏡頭嘅觸覺，之前我都有，但係敏感度仲有提升嘅空間。有一個咁受歡迎同咁有經驗嘅前輩親自示範，會令我更加深刻。」

哈哈哈！兩位靚女都有優厚天資，有基仔幫佢哋一把，梗係可以事半功倍啦！

Juliana（左）、基仔（中）及Madi（右）喺〈勁歌金曲3 Party King〉MV內合作，令兩位「古女郎」獲益良多。

Juliana（左）同Madi（右）都愛食，所以面對美食當前，佢哋都食指大動。

薄切牛肉拌火箭菜、巴馬臣芝士及白松露油（$158），白松露油與其他食材味道相配。

橄欖油香煎雅枝竹（$138）為有特色菜式。

龍蝦意大利麵（$208）以波士頓龍蝦炮製。

台山代表

Juliana原籍巴西，Madi就來自加拿大，兩位20出頭嘅小妹妹，為咗喺天橋上追尋夢想，離鄉別井，為目標而奮鬥。Madi話：「其實我好好彩，要嚟香港做嘢嘅時候，我爹哋都喺香港工作，所以我哋都可以互相照顧。同Juliana一樣，我好鍾意香港，覺得呢度好方便，想要咩一出街就可以揾到。

「依家我最想學好啲廣東話，雖然好多人話廣東話難學過普通話，但係我識台山話，基本上同廣東話有好多相似嘅地方，所以我好有信心學得好。」

跟住Madi仲以台山話介紹自己，「我」字喺台山話讀作「Oi」，其他都真係大同小異，難怪Madi話：「我聽得明電視劇用嘅廣東話，可能係因為電視劇啲對白無乜潮語，同我媽咪、婆婆（同為台山人）講嘅台山話差唔多啦！」

近年我對pasta嘅熱情有增無減，所以今晚啱晒我！

芝士、風乾火腿黑松露醬薄餅（$178）既香且脆。

法國鵪鶉釀意大利飯（$258）盡顯廚師心思。

攻大中華

Madi有「台山底」，對學廣東話有利，而Juliana就北望神州，經常中港兩邊走。「之前我喺廣州住過，喺當地都有做model，依家有時都會返去做嘢。廣州同香港差唔多，生活節奏都係咁急速，一樣咁啱去發展我嘅事業。」

兩位生力軍都對自己充滿信心，各有目標，有目標係成功嘅先決條件，achieve your goal！我預祝佢哋成功，乾！

兩位靚女都愛笑，我哋話題不絕。

Madi仲即刻拎出手機，留下心動一刻。

Juliana原籍巴西，充滿南美人嘅熱情。

Tagliata Style炭燒西冷（$298）嘅Tagliata Style，意指火箭菜配上芝士及黑醋汁，別樹一格。

焗釀蟹蓋（時價）如果洋葱份量再少1/3，就更加完美。

用心經營

「Via 28 Ristorante」老闆娘Jannine（右圖左）喺席間不停為我哋講解每道菜式，誠意可嘉。佢話：「我同其他生意拍檔都用心去為餐廳加多啲有特色嘅菜式，加上有一個好嘅廚師幫手，希望做到一啲食客鍾意嘅菜式。」

Via 28 Ristorante

地址：中環卑利街28號地下
電話：2850 8528