阿松教人 點使六千銀
名嘴王冠一早排喺會展搞咗個大型講座，邀請咗唔少猛人做講者，包括有前財政司司長梁錦松、前香港電訊總裁張永霖等。一輪講題過後，嚟到壓軸嘅問答環節，有觀眾就問，政府即將會派六千蚊，究竟可以用嚟做乜投資？
貴為全球最大私募基金黑石集團大中華區主席嘅梁錦松，自然成為聽眾黃大仙，當大家引頸以待，等佢講啲投資建議時，你估阿松點回應？松哥諗咗一陣，就話施比受更有褔，建議香港市民將六千銀捐晒去畀「小母牛計劃」。
呢個計劃理念係助人自助，用捐款為小農戶提供禽畜及飼養技術培訓，助貧困家庭自力更生。點解阿松要揀「小母牛計劃」，皆因佢係國際小母牛香港分會嘅主席，阿松跟太太伏明霞拉住小母牛嘅廣告，通街都見到，今次聽眾畀位阿松入，佢仲唔借勢勸啲人捐錢，阿松果然識得宣傳之道！
