陳啟宗「鋪鋪」 畀吳光正截胡
恒隆地產（0101）六、七年前開始大舉投資中國，喺各大省市發展商場王國，攞咗唔少核心靚地，部分商場今日都落成開業。原本個計劃進展得唔錯，但呢幾年橫裏殺出個程咬金，截咗恒隆主席陳啟宗幾鋪胡；究竟邊個咁厲害，處處跟陳老闆對着幹？答案咪就係九倉（0004）主席吳光正囉。
話說恒隆計劃喺湖南長沙起個大型商場，○六年跟當地政府簽好晒框架協議，仲喺香港舉行咗個大型新聞發布會，諗住實食冇黐牙。點知個商場遲遲未動工，之後又唔見恒隆再提，成個計劃好似無聲無息咁消失咗。
吳光正（右）跟陳啟宗由中國鬥到香港。
一言好奇怪，四處打聽，原來項目因某啲事，臨門一腳甩拖，恒隆退出。到口嘅肥肉竟然冇咗，恒隆都好冇癮，之但係個故事未完結，幅地竟然輾轉喺今年初畀九倉攞咗。
查實，長沙塊地之前，恒隆曾經競投成都地王，諗住可以喺當地插旗，起個全市最正嘅地標商場。到拍賣當日，恒隆可以講係志在必得，一直都好勇，點知九倉（0004）咬住唔放，係咁搶，最終恒隆覺得個價太高，決定放棄，就係咁失去拓展成都機會。
接連受挫，陳啟宗都幾冇癮，點知咁都未止，雙方由大陸鬥到香港，上個月金鐘廊重新招租，原本已經做大包租三十年嘅恒隆，竟然被連卡佛一腳踢走，搶咗個場，難怪事後陳老闆有啲發晦氣咁話：「人家有本事咪畀人哋做囉！」之後又補充，話利潤只得一、二千萬，對恒隆嘅盈利貢獻只係九牛一毛。
