為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 留星語 2009 年 04 月 27 日

寶刀入鞘 郭政鴻

誰不想「周身刀,張張利」?尤其男人。

本來,郭政鴻身上,只有一張利刀,就是少時廢寢忘餐練成的高強武功。

「我最當fit係十零廿歲時,嗰個階段已經過咗。我依家啲動作,為拍戲嘅,三四下一個shot絕對難唔到我。不過依家動作唔係我主導,亦唔係電視主流,我唔需要刻意去build up呢樣嘢,反而應該花多啲時間畀人睇更多面嘅郭政鴻,我有側面正面後面前面,有top shot,仲有low angle。

「搵到自己鍾意嘅嘢嚟搵食,嗰陣蓬勃嘅時候,搵幾皮嘢一個月喎!同時,我都憎恨自己識功夫,令人哋覺得自己係一個武夫,好慘,你最鍾意嘅嘢,竟然就係絆腳石,累死咗我。」

我身為電視精,看《大時代》時已知道丁利蟹便是郭政鴻,但往後十數年,他彷彿模糊了,直至《野蠻奶奶大戰戈師奶》、《古靈精探》。他感歎,自己演藝事業的路途,比別人長很多很多。

「對以前,我冇眷戀過。我覺得我武術嘅嘢應該要擺埋一邊,將嗰把刀埋藏咗先,第日先再出鞘都未遲,到時觀眾可能覺得:『嘩!好有新鮮感呀!』」

我有一雙眼,近視一百五十度,沒有散光,有戴眼鏡,看到坐在面前,邊點着遮瑕膏畫走眼紋邊說話的郭政鴻,是立體的。

懂武術的甜與苦

0

郭政鴻成長於七十年代的觀塘區,品流複雜,居民文化水平不高。有何紛爭,拳頭解決,毋用浪費無謂的口水。

「嗰陣時撞到嘅全部係郁手郁腳嘅朋友,加上又興李小龍、黃飛鴻,感染咗我對嗰樣嘢嘅興趣,於是走咗去練武,去武館學功夫。我屬於迷嗰隻,任何一樣嘢,一定要沉迷,先有成績㗎嘛!直頭係逃學呀,讀書唔成嗰種,小學六年級已經唔返學,個心散晒㗎喇,讀唔到,中學都未畢業,個心根本飛咗去練武!後悔都太遲喇,老人家講得好啱,讀書對一個人嘅修養,日後行嘅路,真係好重要。讀書係求知識,明理,學與人溝通,講嘢嘅紋路,嗰陣冇一個明燈去指引我,真係浪費咗嗰段光陰。」

他是龍虎武師出身,後抱着玩票性質參加八五年「新秀」,在台上一個後空翻,獲電影公司賞識羅致成為動作演員。

「幾開心㗎,有幾多人可以用興趣嚟搵食㗎?自己可以享受,入息又唔差,幾皮嘢一個月,八十年代喎,真係唔係講笑!你問吓錢嘉樂吖,我同佢一齊開工㗎!

「後嚟我做親嘅角色都係一啲小反派,唔衰唔奸唔做,我自己都做到好乏味,同埋觀眾已經認同咗我做某一種角色。我向公司反映,咁樣落去係死路、絕路。好多謝梁家樹先生,畀個機會我做《野蠻奶奶大戰戈師奶》個camp camp哋角色。點解我做嘅迴響比較大?因為我一路畀人感覺好硬繃繃,突然見我做咁陰柔嘅角色,個驚喜咪會大囉!

「有啲人可能好短時間可以做到,但我可能用咗二十年先有人慢慢留意我,呢個係命運,我都冇辦法可以拒絕,起碼遲嚟,都好過唔嚟!咁多年根基,紅,就係一下咋嘛,Laughing哥,食正個timing,就中咗嘞,搞掂!身為演員都係等呢一下。」

multimedia1

離婚,即代表他們不能一起生活。靚,真係唔係大晒。

「譬如我認拍拖,你哋又追問幾時結婚生仔;到我分手,又追問點解分手,係咪有第三者,乜乜物物……點解要咁煩啫?」

又是「好朋友」

《野蠻奶奶大戰戈師奶》惠賜郭政鴻一個名叫CC的㜈型角色,同時造就他好友名單內多加了一個叫「滕麗名」的名字。在《桌球天王》中,他們還奉旨親嘴。

「人一定需要愛情,需要愛人同埋被愛,除咗生老病死、工作,跟住就係愛,呢樣叫圓滿人生。你愛人或者被愛,個心情係好靚,好甜㗎嘛,冇分年紀,總之愛情就係好美妙嘅一樣嘢嚟。」

郭政鴻○二年與拍拖四年的廣州選美冠軍註冊結婚,○三年情人節擺酒,○六年離婚。

「失敗,係提醒自己要搵個鍾意,同埋一齊生活到嘅人。性格緊要過任何一切,就算你天仙咁靚,對我嚟講都冇用。喺我呢個階段,開心係緊要過任何一切,如果我剩番二十年命,呢二十年不如開開心心過埋落去咪算囉!

「同滕麗名拍親熱戲,工作需要,都要做㗎!演之前我哋見到面咪話:『喂有單咁嘢喎!』大家有心理準備,咁大家本身好熟,識咗咁耐,有一定默契,唔使介懷太多嘢。佢係我好朋友,唔會認係咩特別身份,好朋友啫。就算有(拍拖),或者冇都好,都話冇係最好,節省好多麻煩,大家認為係點咪點囉,我唔需要交代我感情世界係點。」

內地電影《桃花運》有句精警對白:「離一次婚的男人是塊寶,離兩次婚的男人是根草。」孰寶孰草,伊人自懂分曉。

郭政鴻說自己獨行獨斷,一個人收工、吃飯。其實,他間中都有人陪。沒有異性朋友,好dry㗎嘛!

「嘩!你真係以為我好有艷福呀?喺身邊有七八隻船跟住我哋影相,唔知影相角度會係點,唔知會唔會影到我推咗去前面㗎嘛!」

學習溝通

學武之人,多獨行獨斷。郭政鴻雖屬無綫親生仔,但做訪問,只需直接致電約他。拍攝當天,也是他挽着西裝,單刀赴會。

「由我出道至今,我都鍾意自己一手一腳,自己化妝梳頭。男人老狗唔需要勞師動眾,我自己處理到都唔想麻煩人。

「我承認有問題嘅,做咩一個人食飯,一個人收工呀?其實我冇嘢㗎,習慣咗咁樣,但係我依家不斷改進緊,學識點同人溝通多啲,因為我溝通方面不嬲都好鬼渣斗!做任何事都需要人際關係,我用我誠意嚟同你交朋友,有誠意做嘢嘅,一定要同人溝通,唔代表要擦鞋。係咪要埋堆呢?呢個世界一定有,有啲人說話啱聽,佢buy我,交到心就做到朋友。如果佢係掌權嘅,覺得我冇價值都費事睬我啦!

「我無人問津太多年喇!唔通想靜英英咩?正面新聞絕對想多啲囉,我要人哋講吓我呀!起碼衰,都有人講吓吖!話你衰到貼地都有人講,問你回應:『喂你死得未呀?』咁吖!無人問津嗰種感覺係唔舒服㗎,做乜啫?企喺度戇居居咁!哈哈哈……」

他的笑聲,是大俠式的震破耳膜。我覺得,郭政鴻總算捱出頭來了。

「觀眾要嘅係新鮮感,身為現代藝人,要不斷創造新鮮形象,我鍾意扮camp camp又得,扮李小龍fans傻吓傻吓又得!」

「嗰個camp camp哋嘅角色,其實搵一個有資歷啲,唔好咁陽剛味重嘅演員都一樣做到㗎,所以我好多謝製作總監。」

「對跳舞我係一竅不通,但當你面對咁多人,唔會話冇可能,點都跳到出嚟!只不過你未必夠人咁好。」

唔好意思

逢鄭少秋新劇播出,股民都怕有丁蟹效應,丁蟹及幼子丁利蟹攜手合演的《桌球天王》首播當天,恒生指數大瀉六百多點。

「唔好意思!都係咁啱得咁蹺啫,父子一出,你話犀唔犀利呀?跌六百幾!大家小心啲呀嗱!其實都係開玩笑㗎啫,第二日咪升番晒上去,嘭嘭聲升千幾點!我都唔知點解釋,但係真係邪!

「我食蟹!我好鍾意食蟹!鍾意食海鮮,非常之鍾意!唔會怕邪!我冇投資,我賺埋唔係好多錢㗎咋,風險大嘅嘢我受唔起!」

數字遊戲,那及飽肚實際?

我成手蟹貨,都不及準時交稿有糧出般實際。像鮮魚行學校學生,一星期交齊功課,便獲贈即食麵罐頭湯豆豉鯪魚那樣。

各位來為自己打氣。

《大時代》的丁利蟹讓我認識郭政鴻,劇中恒指狂升四千點那天,他跪在鏡頭最前方,搶鏡到極。

丁利蟹被老竇掟落街,下墮途中經過劉青雲飾演的方展博窗外。