需求萎縮 供應劇增

需求受壓，供應又點？先睇睇過去五年新樓落成量，根據政府資料，二○○六至二○一○年，每年新樓落成量平均一萬一千三百個。但近年政府已經明言，會增加土地供應，又會定期賣地，預計可提供每年兩萬個單位，即係較過去五年每年平均數量高出八成。當然，起樓要時間，呢啲單位一時三刻唔會推出市場，但兩年後就應該陸陸續續可以出台，樓市供應一下子大增。

今年中推售嘅新盤，銷情都冇以往咁強勁。

唔單止咁，今年四月開始實施新例限制發水樓，發展商舊年已經搏命入建築圖則（通常圖則獲批就可以起樓），單就去年所入嘅圖則就有六百三十七份，遠遠高於過往每年平均嘅三百多到四百份。即使係今年頭三個月，為趕新例實施前死線，入則量達到三百一十四份，單就一季就相等於往年八成。呢啲圖則通過後，發展商會開始起樓，預計兩年後建成，到時單位落成量豈不是驟增。

當然，睇好樓價嘅人仲會話息口低呀，大陸人又不斷喺香港掃貨，樓市點會差？但一言可以講，息口低唔係今日發生，兼且利息早已見底，好難再單靠呢個因素去推動樓價。至於話大陸客，佢哋買樓只係集中新盤，舊樓成交所佔數量微不足道。

再講，依家冇一個好正式統計，究竟大陸人佔本地樓宇交投多少，好多時大家都係以訛傳訛，講到好誇，乜都入晒大陸人數。而且，大陸正在大力收緊銀根，內地銀行又接連加息，大陸人亦開始水緊，仲邊有咁多錢嚟香港炒樓。

限制發水樓條例今年四月一日生效，發展商忙於入則起樓，兩年後供應實大增。