為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2011 年 09 月 15 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

美味蟹逅

「金牌飯局」介紹過嘅餐廳種類,包羅萬有,今次因為首次請得我好友甄子丹(Donnie)嘅太太汪詩詩同汪圓圓姊妹同場,我特別去到位於灣仔嘅「蟹膳」,一間全港唯一以日式全蟹宴作招徠嘅餐廳,令今次飯局更有特色!

其實不論係Donnie、詩詩或圓圓,都係「蟹膳」嘅熟客,詩詩話:「其實係我其中一個朋友介紹我哋嚟,之後Donnie每次喺香港都會嚟食,因為我哋個個都好鍾意食海鮮,哈哈!」

哈哈哈!既然有最強嘅美味作後盾,加上詩詩、圓圓都係健談之人,今晚嘅飯局,必定盡興!

「蟹膳」每周都會從日本空運新鮮鱈場蟹同毛蟹到港3次,門口設有蟹池,我哋合作手持新鱈場蟹,夠晒新意!

巧手廚藝

詩詩同圓圓喺秘魯長大,兩位都富有南美洲獨有嘅熱情,講到品嘗美食,佢哋亦係專家,除咗今晚嘅飯局地點「蟹膳」之外,佢哋亦都有去過一間我好欣賞嘅意大利餐廳「Palco」,仲讚不絕口添。

詩詩話:「我老公試過之後,就不停同我哋講『It's great!It's great!』,所以我哋去完美國個trip之後,就一家人再去試,我媽咪唔食cheeseo架,但係嗰日就係咁食,仲大讚好食要再點過。不過,因為我哋想試多啲唔同嘅菜式,所以就冇encore個cheese。」

圓圓接住話:「哈哈!係呀,no offense to your老公,但係好多時佢話好味嘅地方,到我哋去試嘅時候都係OK啫,不過啱啱呢次就真係好好味!我最鍾意個pasta,pasta嘅味道同al dente都處理得好好。」

哈哈哈!美食其實係另一種國際共通語言,只要係真材實料,就絕對無國籍、文化嘅界限。好似詩詩咁,都係憑着廚藝俘虜Donnie,「哈哈!我第一樣煮畀我老公食嘅菜式,係西班牙式嘅雞飯,叫Arroz con Pollo,係一種以番茄煮飯嘅菜式。我好記得佢食完之後,就講咗一句:『This is my wife!』下次我一定要煮畀Paco你試吓。」

哈哈哈!This is my friend!詩詩愛下廚,我自然對佢炮製嘅菜式有信心!

「蟹膳」主要提供套餐畀食客選擇,晚餐最低消費為$500。我哋今晚品嘗嘅套餐,每位$1,080。先有前菜(左圖)開胃,再嚟蟹膏三食嘅頭炮,鮮蟹膏刺身(右圖)。

我同詩詩(左)、圓圓把酒談心,難得兩位都唔抗拒威士忌嘅強烈味道,perfect!

另外兩種蟹膏三食係蟹膏多士(左圖)同蟹膏燉蛋(右圖),樣樣鮮味。

親民美食

對於烹飪,圓圓都話詩詩係專家,「通常都係家姐煮,我好少煮嘢食,但係我好鍾意搵好食嘅餐廳。返咗嚟香港咁耐,我最鍾意係去茶餐廳,凍奶茶最好飲,仲有一個好amazing嘅菜式——菠蘿油!通常我都唔會食晒成塊牛油,太heavy嘞,我會搽啲喺個菠蘿包上面啫。」

哈哈哈!茶餐廳文化係香港獨有嘅美食文化,只此一家梗係充滿特色,圓圓認真識貨!除咗茶餐廳之外,圓圓仲會帶埋男朋友蔡加讚(Karson),去唔同嘅親民食肆品嘗美食。「我哋住南區,所以有時會去香港仔『謝記』食嘢,我覺得好食咪帶Karson去試吓,其實要食好味嘅菜式,唔一定要去一啲好貴嘅地方嘅。」

聽到妹妹嘅「食經」,詩詩都忍唔住補充:「係呀!之前佢哋仲帶埋Jasmine(詩詩大女)去『南記』食嘢,個春卷我都覺得好好味o架!」

凍毛蟹由師傅預先拆殼拆肉,加上味道濃郁嘅蟹膏,啖啖肉!

鱈場蟹腳刺身鮮甜,配上柚子入口,更加開胃。

品嘗蟹膏極為heavy,我推介圓圓小嘗一口純威士忌,burn走脂肪!

燒鱈場蟹夠惹味,蟹肉新鮮又清甜。

兩位嘉賓持筷子嘅手勢正宗,我哋齊齊手揸筷子,發揚中國文化!

傳統手勢

唔好睇詩詩同圓圓喺南美長大,就以為佢哋揸筷子嘅手勢唔傳統,兩位靚女手揸筷子靈活,手勢正宗,全靠汪爸爸嚴厲「督工」,圓圓話我知:「細個嘅時候,爹哋一見我揸筷子揸得唔好,就會示範畀我睇,然後叫我練,練得多就OK。」

愛心育兒

講到一對兒女,7歲嘅Jasmine同3歲嘅James,詩詩即時母愛洋溢,「James好得意o架,佢喺屋企咩都食,最鍾意就係飲有豬肉、豬骨煲嘅老火湯,有一次我懶,唔想出街買餸,於是就用咗屋企有嘅菜,煲咗一個菜湯,佢完全唔掂啲湯,好嘴刁o架

「但係一出街,佢喺一個陌生嘅環境呢,就只係同我講:『I want white rice.』,因為佢覺得食白飯就最有安全感又會飽肚。」

哈哈哈!愛心媽媽詩詩仲不時去街市買餸為兒女炮製愛心餐,「我鍾意行街市,買餸煮飯畀佢哋食,依家多數去北角嘅街市,順便接個仔返學放學。」有媽咪嘅悉心照顧,Jasmine同James自然可以健康成長啦!

鱈場蟹火鍋壓軸,加上雜菜盤、蟹肉餃子,非常豐富。

鱈場蟹天婦羅,鮮味有餘,如果炸粉再薄50%,幾近完美。

臨近中秋飯局,詩詩送我一盒月餅,我都祝佢人月兩團圓。

品嘗一頓鮮味蟹宴,口福不淺。

講起一對兒女Jasmine同James,詩詩即展現佢慈母一面。


蟹膳

地址:灣仔譚臣道3號地下
電話:2866 1618