為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2011 年 09 月 06 日

示威群眾變質 混雜「有底」人士

「V煞」撬門衝入科學館掃場,叉住個文弱四眼仔條頸,又「兇」在場阿伯大嬸,企上台上枱面耀武揚威,惡形惡相令人側目,好多市民都擔心和平示威文化已變質,「爛仔文化」正迅速抬頭,發展落去係香港嘅大患!

有知情老友同小弟講,其實近期唔單止示威手法變咗,搞事群眾中更混雜咗一批「有底」人士,已唔係八十後憤青咁簡單,呢樣嘢好值得警方同市民關注!

兩個月前七.一遊行散隊後,有過千人強佔中環幾條主要馬路,其後警方拉人清場,拘捕咗二百幾人,帶返差館查問。據小弟得知,其中一批人曾涉及其他刑事案件被拘捕過,部分仍接受緊調查,個底唔多乾淨。

近期同警察對峙嘅街頭行動中,有一批人言談舉止與過往嘅八十後激進青年有別,部分被捕人士曾經涉及其他刑事案件。

當日本刊調查組記者跟住隊人馬操到中環,亦觀察到一個現象,同過往示威唔同,就係群眾中出現一批紋咗身嘅人士,嗰種紋身係「老式」,好有江湖味,同o靚仔玩嘅新潮紋身好唔同,佢哋嘅談吐舉止亦同近年搞社會行動嗰班八十後激進青年有明顯分別。

記者目擊呢班友在現場兜口兜面指住警員「XYZ」鬧人哋娘親,個樣兇神惡煞,滿口街頭式粗言穢語,似足砵蘭街開拖互兇嘅場面。其中有個長髮金毛(似足「後生版長毛」)就行到最前「炒蝦拆蟹」,聲聲「死差佬」撩交打,完全唔似班學生哥。

到差人準備拉人,群眾中有人高叫「有家爺仔乸嘅,要返工嘅,先離場,差佬要拉人啦」,究竟講畀乜人知,只有佢哋自己知道。

本來任何人都有示威權利,唔應該禁止某類人上街,但群眾之中如果多咗一批背景複雜嘅人馬,社會秩序受衝擊嘅風險就更加大,特別係同差人對峙時,某種人嘅「仇警」意識可能引發更暴力嘅衝突,唔可以唔留意。

講番「V煞」暴力掃場單嘢,事件引起公眾極大迴響,電台節目有七成來電怒斥暴行,網上留言亦係鬧嘅居多,十分罕見,但泛民班友甚少開聲回應,特別係公民黨嘅余若薇、吳靄儀等,早前連環發炮轟「一哥」手腕太硬,但對「V煞」粗暴破壞民主精神就隻字不提。政圈人士指,佢哋一來驚事件沖淡反警權議題,令自己失去王牌;二來知道批憤青會失八十後票,但如果支持呢班友又會失中產支持,故上策係少談為妙!

七一當晚過千人強佔中環馬路,其中一名長髮金毛「兇」差人嘅表現,似足砵蘭街開拖。(調查組攝)