為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2011 年 09 月 09 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

一馬當先

「金牌飯局」即將踏入七周年,多年來多得大家支持,我一定要不斷尋求突破!今次就係「金牌飯局」有史以來,首次喺「香港賽馬會」會所設局,我仲特別邀請知名華人練馬師呂健威、實力華人騎師鄭雨滇,連同兩位馬評人梁浩賢(Simon)同陳思琦(Rita),齊齊暢談馬圈趣事,展望即將喺九月十一號開鑼嘅新馬季!

今晚我同Simon、Rita、阿滇及威哥(左至右)首次喺馬會會所餐廳「凱旋廳」飯局,大談對新馬季嘅展望!

積極備戰

新馬季喺「911」開鑼,我先趁今晚飯局之便,問吓舊年開季第一場就贏頭馬嘅威哥,今季有咩目標?「上季有唔少質新馬加盟,佢哋都需要一段時間去適應同操練,我諗呢班生力軍一有狀態,就唔難做出好嘅成績。我有信心,今季嘅頭馬數目可以突破30場。」

講多無謂,我即刻同阿滇(中)及威哥(右)乾杯!

哈哈哈!有信心係踏出成功嘅第一步,我覺得練馬師嘅工作性質,同我作為電影製作人、經理人一樣,要一眼關七,先可以運籌帷幄。所以,另一位嘉賓Simon話我知,威哥係今季最早帶其廐下名駒落賽場開操,而威哥心目中亦有兩匹特別愛駒,「『勁贏晒』係我近年訓練嘅最有質素嘅馬,佢嚟緊嘅賽程應該以中長途為最好。柏寶(外籍騎師)上季話過,如果『勁贏晒』嘅進度OK嘅話,佢應該有力參加打吡,今季睇吓呢個願望可唔可以實現!

「另外一匹幾好嘅馬就係『好友星威』,佢初初嚟嘅時候已經好有機會贏,潘頓(外籍騎師)就提議我將匹馬轉跑谷草,結果佢第一次跑谷草1,200米就贏。今季我都會安排佢跑谷草,睇吓可唔可以挑戰吓『跑馬地百萬挑戰盃』。」

我向阿滇(中)及威哥(右)介紹好酒,佢哋都聽得津津樂道。

水井坊風沙豆腐($88)香脆可口,最啱佐酒!

凱旋三喜頭拼係開胃首選!

以酒會友

練馬師落力訓練良駒,都要有技術嘅騎師臨場應變,將馬匹水準發揮到極點,呢一點阿滇就夠晒經驗,Rita話:「阿滇喺華人騎師中,技術數一數二,舊年佢喺三級賽嘅『精英碗』賽事入面,唔減磅都可以騎『愛跑得』贏到。」

哈哈哈!阿滇策騎有技術之外,佢對威士忌都有啲研究,今晚我先後以「Glenlivet」18年同21年嘅單一純麥威士忌,同一眾嘉賓暢飲,阿滇同威哥都對我嘅推介大感興趣。我最愛以酒會友,難得今晚咁多位嘉賓都係飲得之人,氣氛自然更加熱烈,我先預祝威哥、阿滇喺新一個賽季旗開得勝!乾!

我同Rita(左)、阿滇(右)相見甚歡。

今次嘅飯局將會一連三集喺《馬上全接觸》同你見面,所以飯局期間有一眾工作人員為節目努力。

「凱旋廳」以唔同嘅中菜侍客,包括北京片皮鴨($358)。

淮杞花膠響螺燉雞($138)以精選材料燉足4小時,夠晒火候。

健康飲食

阿滇喺上個賽季嘅騎師榜排名第6,屬於前列分子,要keep住最佳比賽狀態同身形,佢都話唔可以怠慢,「其實飲食方面都冇話特別唔食某啲嘢,最重要係均衡飲食。反而我會多做運動,跑步之外,最近我鍾意打golf,有時仲會同叻哥一齊打。」

唔講唔知,阿滇喺工作以外,係一名百分百嘅family man,「我個仔依家9歲,個女就4歲,好多時我都會盡量陪佢哋。如果個仔有興趣騎馬,我都唔介意畀佢學嘅,但個女就唔好嘞,始終女仔就斯文啲好。」

阿滇征戰11年,戰績彪炳,新馬季即將開鑼,我祝佢可以喺騎師榜上再創高峰!乾!

今晚由楊師傅(右三)主理所有美食,我同一眾嘉賓自然要同佢合照留念啦!

阿滇(左)英雄出少年,而且酒量唔淺,係酒腳之選!

秘製招牌豉油雞($288)係餐廳招牌菜,豉油汁極香濃。

沙律煙燻白鱈魚($178)以古法炮製魚油豐富嘅鱈魚,有心思!

「凱旋廳」設有拉麵吧,呢個京式手拉麵($38)係即叫即做,夠新鮮。


香港賽馬會凱旋廳

地址:沙田馬場香港賽馬會會所