鄭詩韻收驚喜月餅
中秋節臨近，又係收月餅果籃嘅旺季，收到半島酒店間嘉麟樓嘅奶皇月餅當然威威，但要數矜貴，真係非星洲六星級酒店嘉佩樂（Capella）嘅月餅禮盒莫屬。呢個月餅價錢貴唔特止，仲好有心思，收到嘅人都會好驚喜。
話說呢盒月餅要成四千五百港銀，入面除咗有用料十足嘅月餅外，仲另有乾坤，就係每個禮盒都有一個金幣。雖則並非足金，但係價值一啲都唔輸蝕，因為每個金幣可以換一晚嘉佩樂酒店海景房，仲包埋早餐㖭！
坐落喺聖淘沙嘅新加坡嘉佩樂酒店，住一晚閒閒哋都要三千九港銀，海景更加要四千三百銀！唔單止咁，金幣持有人更有機會喺中秋當日參加抽獎，大獎係價值廿萬港銀嘅白金鑽石項鏈一條！講咗咁耐，究竟係邊個收到咁矜貴嘅月餅？
原來係跟何超瓊份屬老友嘅名媛鄭詩韻，佢話咁大個女最驚喜就係收到呢盒月餅，至於係邊個送，咁就要保持神秘喇。
