老經紀考試牙痛咁聲
中港地產經紀資格互認已經落實，首屆考試喺兩個月前舉行，由於係第一屆，大部分考生唔係來自四大商會委員，就係四大經紀行啲董事級人馬，全屬老行尊。內地仲為呢批經紀搞咗兩日培訓班，希望可以短期內將啲資料同法規灌輸畀佢哋。
雖然係咁，呢啲老經紀實戰經驗就豐富，要佢哋讀書考試，確實幾有難度。特別啲培訓班以普通話授課，筆記文字又係簡體，啲老經紀真係牙痛咁聲。
好喇，到考試當天，試卷共有五十條多項選擇，對香港經紀嚟講，可以話幾深。一言舉個例子，其中有條問內地土地擁有權，選擇答案分別係國家擁有（國有）、人民集體擁有（公有）、私人擁有、以至國家和人民集體擁有（國有加公有），大部分經紀都會揀國有、或者公有，對不起！全錯，答案係國有加公有。
好多經紀考完後喊咁口打定輸數，點知真係奇怪，上星期監管局公布考試結果，及格率竟然達百分之九十七點四，二百幾個考生中，只有六人肥佬。
