潮流興飄浮，但係對於夏永康（Wing Shya）同陳國輝（Tony）嚟講，飄浮呢個idea一早已經係佢哋製作電影嘅idea，經過7年努力，佢哋終於可以將夢想成真，喺新戲《全球熱戀》入面付諸實行。今晚我特別誠邀兩位出色嘅製作人飯局，Tony就帶我去到佢有份投資嘅「Monster Sushi」，一邊品嘗餐廳有特色嘅日本料理，一邊細說佢同Wing Shya化夢想為現實嘅故事。

Wing Shya（左）同Tony（右）合作無間，今次《全球熱戀》仲講愛情講到上太空，有新意！

無重新概念

Wing Shya同Tony喺兩年前首次執導《全城熱戀熱辣辣》，薈聚群星，加上故事有新鮮感，戲中絢爛嘅色彩，贏得好評，今次製作《全球熱戀》，兩位嘉賓都話比上集更出色。Wing Shya同我講：「所有嘢都唔可以重複，一定要好過上一集，先至值得拍！」

哈哈哈！講得好！娛樂圈其實係一個戰場，要迎戰，一定要超越自己！而Tony嘅新概念，就正好提供一次機會，畀佢同Wing Shya再一次超越自己，「其實今次嘅concept，喺7、8年前我已經諗到，我記得有一次我抬起頭，望到個好圓好大嘅月亮，就諗到喺太空無重狀態之下談戀愛，連英文戲名《Love in Space》都諗埋。

Wing Shya（左）對畫面構圖，極為着重。

今晚我同阿Wing（左）、Tony（右）大談電影製作經。

「人喺太空入面，都係要食飯、去廁所，咁一樣會有愛情故事嘅發生，唔同嘅只係身體飄浮緊啫，呢個係一個比較新嘅手法去講愛情觀。不過，以當時嘅科技，好難實現我呢個fantasy，於是我就等，到今年終於可以平衡到fantasy同科技嘞！」

藉科技配合去成就fantasy，期間Tony除咗等之外，仲想像咗各式各樣嘅畫面，「嗰時都唔知拍唔拍得成，亦都未搵到城城（郭富城）同奶茶（劉若英）去拍，但係我已經構思咗一啲鏡頭，好似女主角喊，有滴淚飄過太空艙，滴喺男主角塊面上面；又或者係男主角瞓咗，女主角就飄過去kiss佢一下。」

黑松露吞拿魚腩鵝肝卷（$42），同阿Wing、Tony一樣咁有新意！

Monster壽司（$39）係餐廳點題名菜，以火炙墨魚加上吞拿魚腩蓉同海膽、三文魚籽炮製。

鹿兒島炸黑豚肉（$35），最啱佐酒！

調和各色調

雖然Wing Shya同Tony呢個製作班底不變，但佢哋不約而同咁話，《全球熱戀》唔係《全城熱戀熱辣辣》嘅續集，Wing Shya非常支持拍檔嘅新概念，「佢一講拍太空，我就覺得OK值得拍。我做開攝影，所有嘢都喺視覺美學出發，我畫第一張草圖，就係一個圓形，即係之後太空艙嘅主景。

「Monster Sushi」係Tony（右）同吳彥祖等夥伴合開嘅餐廳，餐廳菜式創意無限。

「我畫圓圈，係因為呢個形狀冇界限，冇上下左右，之後我哋就好快咁發展晒成個古仔，呢招係我喺張叔平身上學返嚟嘅，哈哈！」

Tony補充話：「阿Wing對色彩好sensitive，所以我哋部戲都夾好晒色，城城同奶茶喺太空艙就以橙色同銀色為主調，Eason同桂綸鎂喺澳洲就係藍色同綠色，Baby（Angelababy）同井柏然喺北京就係彩色，全部都配合，而且又可以帶出開心、warm嘅感覺。」

Tony（右）攻讀電影出身，係學院系嘅新一代電影人。

玉子燒（$28）係即叫即做嘅菜式，誠意滿分。

火炙三文魚腩（$38）係一道集色香味於一身嘅菜式。

有緣慶中秋

除咗色調之外，Tony話我知，Wing Shya所畫嘅圓形，仲係今次電影嘅主題，「好多人一見到《全球熱戀》個戲名，就以為我哋係去咗世界各地拍，其實「全球」嘅「球」，係月球咁解，所以喺寫劇本嘅時候，我哋都係諗住團圓同中秋，估唔到部戲真係喺中秋上映。」

哈哈哈！呢啲咪就係緣份囉，Wing Shya同Tony都鍾意為電影加入家庭元素，咁就更加切合中秋節「人月兩團圓」嘅傳統，Wing Shya本身亦係一位family man，「可能我哋始終係中國人，家庭元素唔止係觀眾喜愛，我哋自己嘅家庭觀念都重，所以會容易有共鳴。」

好！我祝阿Wing同Tony新作成功！乾！

Tony腦中仍有大把計劃，正等待實踐中。

我以酒會友，同阿Wing（左）、Tony（右）邊飲邊傾。

鮮山葵白吞拿魚壽司（$26）係時令菜式！

三色軍艦（$60）可以一次過品嘗3款口味。

哥斯拉卷（$39）嘅口感特別，層次豐富。

與名家成長

Tony係新一代嘅電影人，佢喺紐約攻讀電影，同學有依家世界知名嘅Bryan Singer，Bryan最近嘅名作有《變種特攻：異能第一戰》（X-men First Class）。

Monster Sushi

地址：尖沙咀彌敦道63號iSQUARE國際廣場3樓302號舖
電話：2111 1116