曼聯不來港冇損失
有消息傳出話早前想喺香港上市嘅曼聯，因為新加坡交易所三顧草廬，又提供唔少方便，結果曼聯棄香港而選擇星洲。之後有啲市場聲音猛咁批評港交所，話李小加唔夠坡佬積極，人哋新交所個CEO親自飛去英國拜訪曼聯大股東；又話新加坡做事靈活，可以喺申請上作出配合，容忍曼聯啲要求。
睇完呢啲咁嘅批評，一言幾乎要用唐司長個句話去回應。喂！香港之所以係全球金融中心，就係因為有完善法治制度，以及尊重法治嘅精神。真唔明白點解要為咗一間曼聯，就要開綠燈。而且先例一開，難道以後只要有知名企業話要喺香港上市，港交所又要配合，將香港金融市場最可貴之處捨棄，實在係自毀長城。
再講，啲人罵李小加唔夠主動，一言更加戥佢唔抵，今日曼聯話上市就要飛去倫敦，咁明天車路士話嚟、LV話要上市，唔通李小加又要御駕親征，咁搞法佢咪好唔得閒，今日飛倫敦，下周又飛巴黎，其他工作怕且唔使做。
一言仲想講，公司選擇到邊個市場上市，最重要睇呢個平台集資功能，企業上市後，往後若要再融資，香港喺呢方面遠較新加坡理想，要配股、供股或發可換股債券等，都好靈活同好容易完成。你曼聯唔揀香港，隨時損失係佢自己，香港無必要將金漆招牌自塗污點。
