新港城中心 破例租給經紀

樓市下半年交投鬼咁靜局，但上半年仲好好景，唔少地產經紀仍然積極開舖搶地盤，好似美聯集團（1200）上星期就喺中港兩地連開三十三間舖，行業龍頭中原地產更加進取，爆料話上半年已經開咗五十四間分行！

咁多地產經紀搶住開舖，揸住唔少商場收租嘅發展商自然得益最大。早前馬鞍山廣場掀起地產經紀搶舖戰，面積千幾平方呎嘅商場舖位，每月租金居然由十幾、二十萬，搶高到四十幾萬！比起商場內其他舖位嘅租金，閒閒哋高出五、六倍，認真和味。

置業18成功闖關，說服恒地畀佢哋喺旗下新港城中心開竇，成為第一個插旗的地產經紀。右為恒地執董孫國林。

眼見地產經紀瘋狂搶舖，恒地（0012）旗下嘅馬鞍山新港城中心商場，亦想分一杯羹。新港城中心一直謝絕地產經紀喺商場開竇，恒地早兩個月突然打破慣例，首次將舖位租畀置業18開旗艦店，據聞每月租金高達四十萬至五十萬元，比起商場其他舖位嘅平均租金，高出三、四倍。

線人向一言爆料，話四叔今次肯破例，主要喺置業18費盡唇舌游說嘅成果。佢哋一直喺隔籬馬鞍山廣場開舖，點知個竇幾個月前被美聯高價搶走，之後多次入標競投商場內其他舖位，但出價都唔夠其他經紀高，惟有轉移陣地。佢哋見新港城中心未有行家插旗，覺得有得諗，於是不斷游說恒地，最後成功闖關。