湯君明南灣道 建絕密私竇
近年不少工廈和商廈嘅業主，私自將單位改建做住宅，最近又有新「花臣」，就係將商場改做私人會所。老友同一言講，著名豪宅投資者科達地產嘅湯君明，早前喺旗下淺水灣南灣道二號H的小型商場，密謀興建絕密私竇。
淺水灣區一向缺乏商舖，南灣道商場嘅地舖向來搶手，其中郵政局係鐵約租客，其餘商舖租過給超級市場同高級餐廳，近年就由地產代理以高價承租。
至於商場裏面面積近二千平方呎嘅地庫，由於用途指明為儲物室，近年來一直丟空，據悉湯君明幾個月前將地庫私下大改建，有意變成絕密私竇，部分房間就更有機會變做私人會所。
有個裝修工人向一言爆料，話改建工程好大，而且講明係私竇，更加要高度保障私隱，所以老闆落「柯打」要大執，包括將原先嘅後門改成落地玻璃設計，再配以黑色布簾，方便將內部豪華裝修完全遮蓋。
