瑞士小餐館 一碟意粉二百幾銀

唐朝係中國盛世，當時嘅長安繁華程度唔會遜色過今日香港。通常喺啲咁旺嘅地方，樓價同生活使費肯定高得驚人，所以白居易初到長安，畀當時著名詩人顧況用佢個名開玩笑，話長安居不易。

想唔到今天呢個情況就發生喺瑞士，早前歐債危機，美國經濟又有機出現雙底衰退，喺美金同歐羅都唔爭氣時，匯市上啲錢走晒去買日圓同瑞士法郎，特別係後者，升幅更加嚇人，外地人要去瑞士旅遊，真係一啲都唔容易。

瑞郎兌港元一年最高升六成，匯率升幅之勁，冠絕全球。

一言有位金融界朋友，喺八月初去瑞士旅行，碰啱嗰幾日係歐債問題最嚴重時，接着美國三條A評級又被下調，瑞郎升勢凌厲，佢一家四口喺瑞士某商場food court間餐廳仔食嘢，一碟好普通嘅意粉收費換算成港紙要兩百幾銀，一支Evian嘅水唔該五十蚊，四個人盛惠一千多港銀，喂！只不過係咁平民化嘅食肆，若果食好少少，咪要幾千銀？

咁又難怪，嗰個星期初，一瑞郎兌十點八三二港紙，可能大家冇乜瑞郎幣值概念，但可以話畀大家聽，舊年六月時一瑞郎只係兌六點七港元，咁即係話一年升值六成；就算近幾日瑞郎回軟，約莫都可以兌九點八港元，即係升值四成半，以匯率嚟計，確實相當驚人，所以話朋友咁好彩，竟然可以經歷匯率大時代。