市好鋤買家 市淡鋤業主

講開地產經紀，真係良莠不齊，有時佢哋為求做生意，所用嘅手法層出不窮。一言有老友揸住幾層樓，由於希望可以掌握第一手消息，於是將啲樓「hea放」，即係本身唔急賣，若有人畀到價就諗，真正目的係等啲經紀可以時不時聯絡佢，提供資訊，容易掌握到市況。

近期樓市一片死寂，成交幾乎淡過沙士，買賣大減唔在講，連睇樓量都大插水，於是啲經紀成日打電話call客。老友呢排日日收到幾個經紀電話，對方話有客對佢個單位有興趣，但因為個市淡，要求老友要大幅壓低個價。

經紀為做成生意，成日恐嚇啲業主，話個市好唔掂，唔賣遲吓仲差勁。

經紀行內有一句話，市好就鋤買家，市淡就鋤業主，即係市好時係買家市場，經紀就企喺業主個邊，不斷要買家加價；市淡時買家強勢，於是不斷去壓業主個價。啲經紀跟老友講，話市況淡靜，呢個價已經唔差，要把握機會走貨。

不過老友同經紀講，自己層樓放租，絕對不急於賣。點知有個鍥而不捨嘅經紀就話：「你唔急賣樓，即係睇好樓市，咁不如買多間，我有個筍盤介紹！」老友聽完真係要佩服個經紀，事關腦筋轉變之快匪夷所思，但老友都明白嗰句，地產經紀同你講嘅說話要多加分析，唔好句句當真！