為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2011 年 08 月 16 日

公民黨「捉蟲」火燒後欄 對手趁你病攞你命

外傭爭居留權單嘢,搞到怨聲載道,公民黨被指係幕後黑手,議員落區畀街坊指住鼻哥鬧,網上討論區湧出大量留言XYZ,睇嚟唔似打手所為,大部分係真實民眾呼聲。該黨高層亦知今次大鑊,正盡力救亡,但內部明顯出現兩條路線,其他政黨就各懷鬼胎,睇你點死!

公民黨一直靠中產食胡,但外傭案正正令中產罵聲四起,連長期支持該黨嘅專欄作家徐詠璇都撰文質問:「是否只李志喜才明白甚麼叫公義?……我們尊重她打官司之餘,也體諒和尊重政府以及許多市民的想法和憂慮。這一方是否便不人道、沒公義?」黨魁梁家傑同主席陳家洛當然感到勢色唔妥,惟有繼續同官司劃清界線,愈縮愈後,只開動人肉錄音機重複話外傭申請居留權要過「四大關卡」(其大狀口脗被某作者謔稱似足狀師宋世傑)。

外傭案衝擊公民黨選情,隨時火燒後欄,梁家傑要設法救亡。但吳靄儀(左)就認為「公民黨無必要劃清界線」,應立場鮮明!

但黨內嘅激進派代表吳靄儀態度就好唔同,早幾日佢喺報紙寫文,大聲疾呼講:「公民黨絕對沒有必要『劃清界線』!」又話李志喜代表維護公義嘅精神,應受到支持。這段說話似暗示某些人冇「吉士」,為咗現實利益唔敢擺明立場撐李志喜。

吳靄儀係法律界議員,唔使落地區面對選民,自然可以正氣凜然,但公民黨其他高層正部署十一月區議會選舉,如果大大聲企出嚟表明支持外傭,實畀十級颱風吹低。事實上,一位黨內人士向小弟承認,近期在港島及新界東,都有成員受到市民質問,甚至聲言轉投別黨,情況都幾惡劣。

泛民線人透露,公民黨今次準備派約四十人出選搶位,佢哋地區實力唔強,上陣人馬有限,故只能集中於中產票倉嘅選區,而外傭單嘢最引起中產反感,公民黨分分鐘連基本盤都失埋,選情可謂危危乎。

周梁在自由黨策略會議提出,就外傭案向公民黨全面進擊。

其他對手政黨則心中暗喜,準備「趁你病攞你命」奪取其中產票。線人回報,民主黨高層最近就知會地區支部,呢單嘢由仁哥統一向外發言,其他人少講為妙,一於「事不關己,冷眼旁觀」,千祈唔好引火上身,睇法庭點判再謀後着。民主黨表面上同公民黨係盟友,但地區議員早已對公民黨要落區分餅仔感不滿,所以唔使大佬落命令,都會自動自覺閃開,隔岸觀火睇住公民黨火燒後欄,唔會幫手救火,到你燒到散咗,自己就漁人得利。

自由黨策略完全唔同,明刀明槍直插公民黨要害,想佢哋死快啲。線人指,自由黨早前開策略會議,周梁等認為今次係大好良機,一定要全力進擊,首先做咗一次民調,指八成幾市民認為公民黨要對事件負責,然後在報紙刊登廣告,盡數事件對香港嘅遺害,而主席劉健儀隨之高調發炮,目的係轟散對方陣地,然後入侵搶地盤。政治就係咁殘酷,吳靄儀指其他黨抹黑、抽水,以前,泛民都咁做啦,對手只係有樣學樣啫,吹咩!