排球王子變上市公司副主席
中國或者香港運動員嘅出路其實好悲哀，除非你係當紅世界級人馬，攞過國際比賽獎牌，藉名氣拍廣告或做品牌代言人，退休前可以大賺一筆，否則之後生活真係唔容易；通常做到教練都唔錯，唔少運動員退役後，淪為保安、洗碗，甚至有人要喺街頭賣藝。
能在退役後成功嘅運動員更加係寥寥可數，李寧可以話係異數，能創立一盤生意，成為億萬富豪。不過，一言最近喺朋友介紹下，認識咗中國龍新能源（0395）位副主席，覺得佢好熟面口，再睇睇名片，叫做汪嘉偉，再諗諗，嘩！原來大有來頭。
年輕一輩可能唔知汪嘉偉係乜水，但有番三張幾嘅朋友，好有機會記得佢係邊位，特別係女性，事關汪先生就係曾經瘋魔無數日本妹嘅「排球王子」。汪嘉偉喺八十年代係中國男排主將，身高一米九三，生得俊朗非凡，球技又了得，女球迷對佢如癡如醉。「王子」外出比賽時，每次扣球後例牌要撥撥秀髮，呢個動作教萬千少女亢奮不已，啲o架妹更加視「王子」為偶像。
「王子」退役後，曾執教中國男排，二千年未能帶領球隊進軍悉尼奧運，於是退出運動界，轉而投身商海。「王子」跟朋友搞咗檔石油儲存生意，後尾愈搞愈掂，最近畀中國龍新能源收購，作價三億五千萬，龍新支付一億五千萬現金，再發新股畀「王子」，於是乎汪嘉偉成為龍新第二大股東，仲被委任為副主席兼非執董。
