為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 親子天地  > 父能量 2011 年 08 月 04 日

區永權樂做懶爸爸

「BB有便便喇!」今年初榮升爸爸的有線主播區永權(Albert),憶述手拿兒子區靖嵐(Aidan)的便便時,興奮過奶粉廣告中的媽咪。

由型男變成潮爸,外表依然花o靚的區永權,抱着大眼囝囝Aidan,在訪問中無端變成女人聲,跟兒子說話,更謂最難忘是聽到醫生說BB的血型是AB型,「因為我老婆係A型血,我係B型血,感覺係我哋兩個嘅結晶品,好感動!」

為結晶品回復單純的思想,他亦未如現今父母對培育孩子一樣,有全盤計劃,「我哋好懶,唔會睇書或上網睇吓點湊仔」,又強調不請工人、不讓孩子入名校,「請工人會搞到個仔變咗『港孩』,唔揀名校係唔想佢咁細個就有咁多壓力咁辛苦,當然,佢係好叻好聰明嘅,咁就冇所謂。」

Aidan遺傳了父母的靚樣,眼仔睩睩、皮膚白晳,討人喜愛。

當了爸爸後的區永權,無時無刻也想着兒子,一有時間便會一家三口外出享受天倫樂。

拒做乖乖

○九年五月,區永權與拍拖三年、任職設計師的Clara結婚,今年一月五日,兒子區靖嵐出世,重五磅十二安士,跟媽媽一樣弱不禁風,Clara憶說:「頭嗰幾日,同BB沖涼,見到佢好瘦,睇到個心好痛。」Albert指着她的肚說:「你睇佢咁細粒,BB個『屋企』得咁大,點會係肥B?」也因為Clara懷孕時又暈又嘔,「臨生前仲嘔緊,辛苦到爆!」

區永權形容兒子的性格愛扭計,而且好cool好chok,「天跌落嚟都冇反應,又唔會望人,冇互動o架,成日都係咁嘅樣,我初時以為佢係唔識得笑o架,點知個幾月前,佢突然間自己笑到o架o架聲,笑咗分幾鐘都唔停。」區永權隨即從手機中找出短片,邊笑邊說。

及後,區永權更向記者展示為兒子易服的照片,「因為有個親戚屋企有啲女仔衫,size又啱Aidan着,咪試吓同佢着裙仔囉,點知一着出嚟,嘩,又好女仔樣喎。」區永權說,他並非想多生一個女兒,不過認為也有需要為兒子多添一個伴,「獨生子有好多嘢都學唔識,唔識sharing,唔識悶,因為慣咗一個人,我最驚佢連悶都唔識。」

區永權形容兒子Aidan經常chok樣不肯笑,這個口擘擘想笑的表情,是拍了十多張照片才捕捉到。

訪問當日,區永權太太Clara雖然也在場,但區永權仍然子不離手,全程抱到實,兒子也用小手捉實爸爸,果然如Clara所說,兒子黐爸爸多啲。

拒請傭工

一索得男,兒子又生得精靈可愛,難免會寵愛有加,變成溺愛,他說:「我好衰o架,成日提自己唔好抱佢咁多,佢喊嗰陣,我會話由得佢喊啦,但佢一喊到聲都沙埋,我就會好緊張咁抱番起佢。」訪問當日,區永權全程子不離手,單手抱實未呻過一聲。區太Clara更說:「BB鍾意黐爹哋多啲,因為爹哋夠橫,抱得佢舒服啲。我有次餵佢飲奶,飲完之後幫佢用不倒翁式(雙手托住嬰兒頸部,然後360度慢慢旋轉)掃風,點知一跣手,佢成個跌咗落地,爭啲整親佢條頸,幾驚呀!好彩冇事咋。」區永權斜睥着太太說:「點解我唔知o架?」

跟很多父母一樣,區永權與太太只希望Aidan健康快樂,而且言出必行,沒有打算讓孩子上興趣班,「咁仲忙過返工喎,同埋我睇過《星期日檔案》,講『怪獸家長』同『港孩』,好驚我哋一家人會做咗主角!我亦見到身邊嘅朋友因為逼仔女學呢樣學嗰樣,搞到小朋友好唔開心,又唔敢同父母講,我淨係希望同囝囝變friend,做一個識得體恤子女嘅爸爸。」

區永權沒有請傭人幫忙湊小孩,就是不希望兒子變成飯來張口、衣來伸手,凡事依賴的港孩,「依家個仔由老婆同外母幫手湊,老婆跟陪月學咗兩個月湊仔,依家都上晒手,不過我都有幫手o架,每晚都會同老婆一齊幫囝囝沖涼,兩公婆一齊做,又快手又安全嘛。不過如果生多個,都可能要請工人喇。」

區永權與拍拖三年、任職設計師的女友Clara於○九年五月結婚,並在四季酒店舉行婚宴,場面盛大。

拒讀名校

至於為兒子揀選學校,區永權與太太也未有從長計議。由於他們均是天主教徒,兒子三個月大時便領洗了,因此Clara也希望兒子入讀天主教幼稚園,她說:「不過,天主教學校冇國際學校咁輕鬆,天主教嗰啲名校又難入,唔知佢讀唔讀到,讀到都辛苦啦,佢依家先半歲大,睇吓佢咩狀況先,如果佢唔叻,又冇理由逼佢,盞仲辛苦。」

當了爸爸後,區永權笑言「成年冇出去玩」,太太懷孕時情緒波動,經常發脾氣,因此,他要時刻陪伴左右;至Aidan出世後,每晚下班也第一時間回家陪兒子,進行親子活動——沖涼,甚至連與太太的二人世界也沒有了,「乜都冇晒喇,不過做咗爸爸之後,更有原動力叫自己努力搵錢,而且同其他有仔女嘅人多咗好多話題,好似之前做李嘉欣個仔百日宴MC,同許晉亨都傾咗好耐偈,淨係BB手汗多腳汗多,都可以傾好耐。」

○九年二月娛圈慾照風波後,張栢芝應有線主播區永權之邀接受獨家訪問,令區永權人氣急升。

有線主播鄭文的女兒Sabrine比區永權的兒子大一個月,所以兩位初為人母人父的拍檔經常交流湊仔女經;這天兩個BB在有線大樓相遇,即來個合照。

區永權太太Clara憶述,Aidan出生時只得五磅十二安士,「見到都心痛」,不過現在半歲大已經有十多磅,放心晒。

個多月前,區永權為兒子Aidan易服,穿起裙仔的他立即變成小女孩。