白韻琴在拍照期間，一直熱情地向我們介紹這個中環辦公室內，放到四周角落的各種收藏品。「呢啲櫈有紫藤、酸枝、黃花梨木……呢座小觀音係白玉，之前我哋送咗座人咁高嘅粉紅瑪瑙觀音畀清洪，依家起碼值過千萬呀……呢度最多係馬嘅擺設，阿Paul（謝偉俊）五行好需要火，馬係屬火……呢度啲收藏，只係我千分之一，只係民間粗品，我有好幾個地方呢，包括我嗰間成七千呎嘅別墅，都可以擺滿晒我啲收藏，唔使買傢俬！」

談過了收藏擺設，她又告訴我們，這天一身打扮加埋不過幾十塊錢。「我有好多衫都係去outlet買，我覺得唔需要一定係着Gucci、Chanel，好似着制服咁囉！我以前成日去Joyce買衫，有次買條牛仔褲，個sales話香港得一條，點知去到葉蒨文生日會，我就同佢撞褲，打去問番Joyce點解會咁，佢哋竟然話：『係呀，香港得一條，九龍得一條呀嘛！』哈哈！你話係咪激死呀？」

有碗話碗、有碟話碟，白姐姐就是個這樣的人，就如她的新著作《有情有性》，內容都是針對當時熱門話題，寫出她個人的看法，文字耿直卻又不失大體，觀點精闢卻又引人共鳴。

「我呢本書，雖然寫咗好多人物，但真係勁同對人有傷害嗰啲，我都冇寫，依家呢啲內容，都係好真實同好有趣味性。有啲人睇番，都覺得我寫到啲真嘢出嚟，又隱暪咗啲尷尬嘢。其實幾好玩o架！」

果真打開天窗說亮話。

新著作《有情有性》，內容繼續敢言作風，亦刊登了很多她的珍貴舊照。

勇氣

新著作《有情有性》，白韻琴承接了她向來敢言率直的作風，例如她會直指張栢芝是「鋒芝婚變」的大輸家，又會說陳振聰看來並不懂甚麼風水命理；彷彿沒有任何負擔，便寫出隨心所想。問她這種勇氣從何而來，她說：「呢個係我嘅性格啫，我係義無反顧去講我想講嘅嘢。可能我係桂林人，嗰度山明水秀，周街都有生果執嚟食，又有魚可以捉，變咗桂林人生活同性格都好隨意o架，我咪遺傳咗呢種好寫意、好真情嘅DNA囉。」

多年來，可有因為個人言論而得罪了他人？「我講嘢係好真o架，唔真嘅嘢無謂講呀係咪？但我亦都得罪過好多人，因為我口沒遮攔。Rod Stewart有首歌話齋：我唔可以令到每一個人開心，但如果我選擇講真話，就一定會令到某啲人唔開心o架啦。冇o架，我講完就算o架啦，如果有人再話我乜都好，我根本就唔當係乜嘢一回事，我又唔會還擊嘅。好似啲人叫我唔好再講栢芝，好似好傷害佢咁，我其實只係講過一次，話啲小朋友應該跟狄波拉，然後其他傳媒不停轉載咋嘛，我冇傷害佢噃……不過我已經受到好多人嚟干涉我，所以我都唔再出聲喇！」

她說，對於自己曾發表過的說話，其實當中有些也令自己後悔的。「我係後悔有啲嘢，真係唔需要咁血淋淋咁反映個事實出嚟。」

上周六（七月廿三日），她為新作《有情有性》在書展舉行簽名會，阿Paul也來支持。

才女

白姐姐曾於美國三藩市居住過七年，在當地讀大學兼教導小學六年級生，當他們的心理輔導師。回港後當過劇集藝員，八六年起，則開始在商台開咪主持節目，其中以《盡訴心中情》最為人熟悉也最深入民心，聽眾要生要死致電向她求助感情事，她往往都只以低沉的鼻音給對方當頭棒喝，或者直截了當叫對方分手、離婚。

「我做《盡訴心中情》係好有爭議性o架，但係當其時或依家啲人點話我唔好，依家都係話我講得啱，有人會話我當時講嘅嘢係錯咩？到依家so far都冇一樣嘢證明我當時講啲嘢係錯o架！我講嘅嘢係永恒o架！」

八九年一月，她曾成為《Playboy》封面女郎，拍性感照片。

九十年代，愛滑水的白姐姐，不時拍下泳照。

九三年她曾在北京人民廣播電台以國語開咪。「嘩，紅到啲傳媒係咁追訪我，我幾乎日日要搬酒店，連中宣部都好關注，要我做錄音，唔准做直播，我做咗個幾月，新城請我，咪返嚟做直播囉，做咗兩年，就發生祥嫂件事，停咗咪。陳欣健後來見番我，都話好後悔當時要我停咪，因為咁樣令我、電台同佢自己都幾敗俱傷！」

叱咤不同媒體數十年，白姐姐的言行舉止一直前衛大膽，加上她學識廣博，人們都稱她為香港其中一位才女。「蠢材個材呀嘛！哈哈哈！你話香港仲有邊個係才女呀？」我們舉了林燕妮做例子。「佢有乜嘢才呀你話？寫幾個字就係才女呀？香港所謂啲才女都係氾濫、唔係好貼切，或者有啲人係，但我體會唔到囉，人哋咁叫我，都係對我嘅一個鼓勵啫，我自己就慚於接受呢個稱號囉。」

接着，她忽然很感慨地說：「我只係一個喺呢個社會上冇乜貢獻同成就嘅微生物，我嘅生命係廢棄嘅。」

在美國環球航空任職時的白姐姐。

白姐姐說，當年美國環球航空的橙色制服，是由Valentino設計的。

保羅

廿三年前，白姐姐遇上比她年輕十多年、當律師的謝偉俊阿Paul，一直以來，他們這段情都不時成為外界談論話題，更有說他們早於九七年已在美國註冊結婚。

「阿Paul都話唔係同我結婚咯，我同佢根本唔係男女關係，而係理性加感性嘅戰友。我本來只係諗住同佢打完官司就拜拜o架啦，但佢啲官司打完一單又一單！佢係個好有抱負同理想嘅人，令佢得罪咗好多當權派，我喺佢身邊，都感覺到佢嘅慘況，佢打咗十幾廿年官司，使嘅錢以千萬計，但佢真係一個視錢財如糞土嘅人，不斷去創傷、失敗，又不斷去奮鬥，我係從心裏面去敬佩、支持佢o架！」

年輕時的白姐姐，她說當時有個綽號叫「大眼妹」。

據她形容，她跟阿Paul的關係，比她做《盡訴心中情》所面對的case更難搞。「同一個男人一齊廿幾年，又唔親熱又唔咀，但依然仲肯不離不棄喺佢身邊幫佢，我就係個咁嘅人！我哋根本已經超越咗世俗男女嘅關係，我哋係互相支持，但又有好多矛盾，可以話亦係互相折磨……回頭已是百年身，我諗唔通，亦唔想再喺我人生度再發生！哈哈哈！」可有想過索性瀟灑了斷這個關係？「我點可以獨善其身o架？我係義無反顧，唔可以就咁棄船！呢個係我嘅選擇！當我真係愛一個男人嘅時候，我都係全心全意！」

那麼，阿Paul多年來令她最大改變是甚麼？「阿Paul個人好保守保留，佢覺得我直腸直肚呢啲性格係我冇家教喎！哈哈哈！佢成日都叫我講嘢收斂啲，我都因為咁都收斂咗好多，佢已經撳熄咗我性格好多火！哈哈哈！」

跟阿Paul一起廿三年，白姐姐說，他們的關係已超越了塵世間的男女關係。

男人

白姐姐直言，跟阿Paul一起這些年來，身邊也不乏追求者。「我同佢一齊經歷咁多風浪，唔係冇男仔鍾意我，不知有幾多！一個女仔多人鍾意，係理所當然，唔需要攞出嚟炫耀！我由細到大都好多人鍾意我，但我每次識一個男朋友，我都好真心對佢哋o架！」

閱人無數，又一直不乏追求者，白姐姐說，男人根本沒甚麼大不了。「男人？鍾意你嗰陣咪好好囉，但如果佢又唔錫你又唔鍾意你，又周圍去播種，咁有乜謂呢你話？」

白姐姐的《盡訴心中情》多年來深入民心，香港人幾乎無人不曉。

播種？「播種係男人嘅天性，又係人生最重要嘅嘢之一。點樣再傳後代係最efficient呢？當你有不同嘅性伴侶，將你啲種播喺佢哋度，咁你播種嘅機會咪會大啲囉！所以男人都係會鍾意唔同嘅女人嘅！貓同狗都會叫春啦，不過啲貓狗冇教育，唔識，一叫就喺街度做，所以一個男人出去溝女，差唔多係天性，但因為教育要違反天性，所以只要你唔睇住個男人呢，佢幾鍾意你都係假，佢都會周圍去播種，就好似人有三急，就算嗰個厠所好唔靚、好污糟生晒蟲都好啦，佢都要去小解同大解o架，不過係解決生理上嘅需要咋嘛。女人喺播種方面冇咁重視，因為當你真係同人性交時，就完全有機會之後半生都要做人阿媽、要付出好多，所以佢哋好知道同人亂咁發姣會有乜嘢後果！

「我覺得男女嘅性交呢，講清楚只不過係一個好原始嘅供求咋嘛，但依家啲人就講到係一種享受，或者生活情趣或者係愛情嘅基礎，其實係非常之錯誤！」

都說她就是個打開天窗的人。

早前，白姐姐主理的「盡訴心中情基金」聯同「香港航空」免費邀請四十個家庭暢遊海南島。

白姐姐與薛芷倫

懂得幽默的人，通常都會較聰明，思想也較豁達。

白姐姐明顯也是個聰明人，所以訪問尾聲，我也嘗試問她一個較輕鬆的問題：怎樣看外界所說，病癒後的名媛薛芷倫樣子跟她相像？

「哈哈哈！」她先來一陣笑聲。「薛芷倫，個個都話似我！哈哈哈！佢梗係會唔開心o架係咪？」我告訴她，其實薛芷倫也表明很欣賞她，而且亦覺得她是個美女，似她是一件光榮的事云云。「佢都好靚呀！我有乜資格同佢似呀？哈哈哈哈！有好多人話我哋似，甚至剪埋啲相畀我睇，我都希望似佢啦！佢咁靚女！你哋有冇睇過我後生啲相？咁多年我個樣都冇乜變過o架！」

病癒後的薛芷倫，今年初再次活躍ball場，對於被指樣貌像白姐姐，她表示感到很光榮。

短髮兼做了highlight的白姐姐，驟眼看的確有點像薛芷倫。

說句老實話，近看的白姐姐，皮膚的確不錯，毛孔幼細，皺紋不多。「我冇整過乜嘢Botox，如果有整，你哋都睇到啦！咁多年嚟，我冇乜點變過，最主要係我唔會亂咁食嘢，一個人食嘢多，新陳代謝會快咗，人會好易衰老，我試過道家嘅『避穀』（即辟穀），兩個月每日只係食半個蛋白，飲礦泉水，結果瘦咗三十八磅！皮膚靚咗、啲斑又冇晒，連啲過濾性病毒都冇埋。呢個健康法門，我好想同大家share囉！」

See，姊妹們，要做個又靚又健康又聰明嘅女人，真係唔容易囉。