為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 親子天地  > 父能量 2011 年 07 月 28 日

寵愛有爸 劉家輝

劉家輝,育有三女一子,第一任妻子為他誕下兩名女兒,現在都已嫁作他人妻;現任妻子則為他誕下一子一女,兒子在新加坡讀書,幼女在港讀中四,成績名列前茅。

劉家輝總是說:「讀多啲書好啲!」

生於五十年代,在家教嚴謹的時代成長,劉家輝也滲透着老一套教育下一代的方法,卻少了點霸氣與嚴肅,「我唔係一個好爸爸,我太縱我啲仔女喇!遊戲機一出就買,仲set up晒啲games喺裏面!」對四個仔女錫到燶,連劉家輝自己也感覺過分,因為他要子女知道如果沒有這個爸,便一無所有!

劉家輝非常重視家庭聚會,每年生日均要四個仔女一起吃飯,圖為○九年劉家輝生日時拍攝。(左起:三子Kris、二女Bonnie、大女Angie及幼女Sonia)。

「點解會約我做親子訪問,我都唔係一個好爸爸!」劉家輝皺着眉頭問。

他說,對三女一子只是「一味縱」,「去第二度拍完戲返嚟香港,會請佢哋食飯,又送呢樣又送嗰樣!」

因為愛,才會縱。

劉家輝今年五十六歲,在傳統管教方法成長下,他也有古老傳統的一面,希望子女讀大學,「咩都假,最緊要讀多啲書」;卻又有新潮開放的一面,「遊戲機一出就買,仲set up晒啲games喺裏面」。他寧願提供娛樂給子女,總好過他們在外自尋快樂,分分鐘闖禍,「留喺屋企玩,好過出面玩,啲朋友仔又可以嚟我哋屋企一齊玩,我就可以知埋佢識啲咩朋友喇。雖然我成日買嘢畀佢哋,但我會講,佢哋之所以想要乜就有乜,只係因為有我呢個老竇,如果冇我呢個老竇,就乜都冇!所以佢哋都想我成日喺佢哋身邊,知我錫佢哋嘛!」

劉家輝疼愛子女,大小事也為他們張羅,就算工作多忙都好,也會為他們領取護照,「總之乜都幫佢哋做,我都係衰o架喇!」好像兒子兩年前到外國升讀預科,劉家輝深怕英國、美國等地思想開放,兒子容易受引誘誤入歧途,便為他搜羅新加坡的學府,希望他能在優質無污染的環境下努力求學,「佢未落實去新加坡讀書之前,我先帶佢去當地旅行,佢真係鍾意嘅咪去囉,呢啲嘢冇得逼,好似佢嚟緊要升大學,我都畀自由佢自己選擇,留喺新加坡定去第二個國家讀大學。」

劉家輝的二女Bonnie於今年初結婚,在新加坡讀書的三子Kris(右二)特地返港出席家姐的婚禮。

劉家輝就是這樣,誘導子女循着個人期望進發,卻從來不強迫。

八歲習武、貴為國際武打明星的他,曾幾何時也希望子女練得一身好功夫,遂租用文娛中心的場地,連同一班師兄弟教他們打功夫,「玩咗幾個月之後,佢哋話冇興趣,咁唔緊要啦,由佢哋自己選擇,最緊要有運動啫,結果個仔同細女都揀咗劍擊,梗係啦,白衫白褲,有冇型吖你話?」

劉家輝的大女兒Angie今年二十九歲,二女Bonnie今年二十七歲,三子Kris十九歲,幼女Sonia十七歲,兩個年長女兒與第一任前妻所生,他離婚後帶着兩女再娶,「我成日都同兩個女講,係爸爸破壞咗佢哋嘅童年,當日分開係爸爸唔啱,媽咪冇唔啱,要孝順多啲媽咪。」劉家輝說,當年掌握兩女撫養權,全因為不想前妻帶着兩個女,想再嫁都難,想不到今時今日前妻仍是孤家寡人,更沒有與他聯繫,「佢冇睬我好耐囉!」

至於現任妻子為生意人,經常周圍飛傾生意,「仔女多數係我同工人睇。」兩個大女反叛期時,Angie曾回到母親身邊,共住三年,二女則入住聖士提反寄宿,「我一個控制唔到佢哋,個個我都好錫,我成日同細嗰兩個講,嗰兩個永遠都係佢哋家姐,雖然唔同媽咪,但都有爸爸嘅血喺度!細蚊仔嗌交實有,但千祈唔可以講啲傷害對方嘅說話,咁即係傷害咗爸爸,大家都係一家人!好在佢哋相處都好融洽,細嗰兩個一樣叫『家姐』,有啲叫名算o架嘛。每年我生日,我都一定要四個喺齊度,唔好話分開食飯。」

今年五十六歲的劉家輝,最開心是聽到子女親切的問候,簡單一句「着多件衫呀」已經很溫暖。

自言不是個好爸爸的劉家輝,每次在外地拍完戲返港,必定請四個仔女食飯和送大批禮物。

現在兩個大女均已嫁人組織家庭,二女兒兩個月前更誕下女嬰,三代同堂,榮升外公的劉家輝笑說,最不習慣便是二女婿稱呼他做「阿爸」,「大女婿怕醜啲,叫我『師傅』,所以二女婿咁叫我,唔係好慣!」不過提到與子女間的感動時刻,外表硬朗的劉家輝嘴角上翹,說:「簡單一句問候已經好開心,例如叫我着多件衫呀,大女又話喺屋企煮飯畀老公食,叫我嚟埋食呀,呢啲說話聽落已經好舒服喇!其實教仔方法,最緊要畀自由佢哋,但又唔可以話唔睇住佢哋,做父母嘅做錯嘢都要同仔女say sorry,以前我老竇點會say sorry啫,打死你添呀!時代唔同咗喇!」

劉家輝直言希望兒子做警察,認為政府工福利好,不過仍然讓他有選擇的自由。

去年二月,劉家輝抽空到新加坡探望在當地讀書的三子Kris,他說,讓兒子到新加坡升學,全因為思想保守又嚴謹,「而且我去探佢都近啲。」

劉家輝經常提醒子女要多讀書裝備自己,英文尤其重要,因此經常在家播放英文歌提高他們對英文的興趣。

幼女Sonia與哥哥Kris感情尤其深厚,形影不離,十多歲時更一起學劍擊。