穆迪報告 錯到無譜

評級機構穆迪一份紅旗報告，搞到多家民企股價大插水，影響所及，大市單日跌六百幾點。一言好奇怪，你穆迪係做評級，主要是針對債券，點解會出份咁嘅報告？

至於內容更加錯漏百出，例如佢質疑某啲民企上市三年內轉換核數師，企業管治出問題，但嗰幾間民企好似佳兆業（1638）、華南城（1668）同禹洲地產（1628）即時發聲明，根本冇換核數師。

又好似批評某啲公司，話家族色彩濃厚，但一言睇吓嗰啲公司，好似西部水泥（2233）或者百盛（3368）等，持股都係三到四成，相比起好多香港企業嚟講，家族等閒持有五到六成，呢個持股量又點算多呢。

穆迪報告資料有誤，難怪華南城老闆鄭松興唔高興。

穆迪又話中國玻璃（3300）由家族持有三成股份，查實該公司大股東係聯想集團。最離譜係話華南城（1668）三年內更換行政總裁，實情係公司上市前只有主席，但要應交易所要求，先多加一個行政總裁職位。

穆迪連基本資料都搞錯，又點去做批判，啲畀佢錯誤批評嘅公司幾咁無辜，小股民單日唔見一兩成，更加係慘情，難怪有公司跟一言講，穆迪要還公司一個公道，起碼要致歉。我就跟佢講，你唔使旨意，美國次按出事，好多質量有問題嘅債券，竟然可以攞到三條A評級，大家質疑呢啲評級機構點做嘢，但佢哋咪又側側膊唔多覺，繼續喺度扮專家。