富豪買屋 百密一疏
富豪買樓通常好低調，為咗唔想身份曝光，都會用海外註冊嘅空殼公司買樓，有關公司啲文件及買賣事宜，就委託秘書公司代勞，傳媒無可能查得出買家身份。
月前城中富豪斥資逾八億購入南區大屋，同樣以一間英屬處女島登記嘅公司購入，原先以為冇有失拖，奈何百密一疏，身份最終都曝光。
富豪以空殼公司入標，但因為間屋以招標出售，富豪要留低資料方便聯絡，所以佢將私人秘書個電話寫喺標書，聯絡地址係集團總部。由於係招標，有關標書被視為臨時買賣合約，律師樓只好將標書拎去土地註冊處註冊，結果份標書可以畀公眾喺網上查到，再根據入面所報嘅聯絡地點同私人秘書個名字，傳媒一睇就猜到係邊個，仲唔第一時間報道。
