戲院大王 欣賞星爺
星爺入主比高（8220）後，唔經唔覺都年幾，一直冇乜動作，到近日話要拍《西遊記》，同時進軍內地戲院業，比高股價即時飆升。不過，要喺大陸搞戲院並唔容易，星爺都要拍埋啲大陸佬，今次佢就搵咗中華影業做拍檔。
中影總裁叫印鋼，香港人可能唔多識，但原來大有來頭，佢係中國戲院大王，過去十年喺中國起最多大型戲院。即使成龍，近年喺北京搞嘅電影城，都要跟印鋼合作。
印總好欣賞星爺，除咗因為星爺好有生意頭腦外，佢認為最難得係星爺拍片咁耐，竟然冇一部係蝕錢，呢啲拍檔喺邊度搵？
查實在內地拍戲賺錢絕不容易，舊年大陸一共拍咗五百多部片，有四百部連上映嘅機會都冇，能夠賺錢只有約十部。雖然中影唔係投資拍電影，但只要有星爺嘅戲長期喺旗下院線上映，戲院賺錢應該冇乜問題。
