香檳大廈創公契先河
白鴿黨總幹事陳家偉涉嫌嫖妓一事成為城中熱話，嗰幢滿布「一樓一」嘅香檳大廈，原來喺香港地產發展史上，係具有劃時代意義。話說香檳大廈塊地原由何東持有，已故全國政協副主席霍英東喺一九五四年以一百一十四萬購入，起咗兩座樓高八層嘅香檳大廈，當年仲係全九龍最高大樓。
霍老計劃將B座拆散出售，但半世紀以前，市場買樓係全幢買賣，根本冇分散賣，要咁做受到好多法律規限。霍老絞盡腦汁，最終得到一位英國律師幫助，以公共契約模式，將整幢樓分成多張屋契，每個契約佔多少分數來攤分業權，打破難關，得以成功拆散賣。亦由香檳大廈開始，市場相繼模仿以大廈公契模式去拆售樓宇，一直沿用至今，所以你話香檳大廈喺本港地產史中係咪舉足輕重。
今次出事嗰座正正係B座，而A座就由一名叫高維山的人士在五七年買入，作價只係五十七萬，地產經紀估計，今日要買A座，冇十億都唔使諗，即係話高家持有物業至今，升值一千七百五十五倍。
