一條金 做三好學生
港人想將仔女送去國際學校，好多時要幫間學校買幾百萬債券先有機會面試；今時今日，大陸人要為仔女教育鋪路，雖然未必要花幾百萬，但一條金條點都走唔甩。
有喺北京做生意嘅朋友跟一言抱怨，話依家喺北京生活水平高，而最大開支更加係花喺子女教育上；除咗花錢畀仔女上試前準備班唔在講，近期仲多咗筆酬酢費。
呢筆係乜錢？話說喺國內，好學生都會獲頒唔少榮譽，例如「三好學生」，即係在家做好孩子、在校做好學生，在社會做好公民；然後「三好」又會分級別，由省級、市級至校級等。為咗未來子女前途，家長都好希望自己個仔女可以獲此殊榮，於是乎出盡八寶，向老師大獻殷勤唔在講，飲茶灌水更加少不了。
有人為討好具影響力老師，爭取一個校內三好榮譽，於是向老師送一條金條。自從開咗個頭後，幾乎成為通例，你要仔女攞三好，基本入場費係一條金。嘩！校內三好都要一條金，咁省內三好咪要一層樓？
