今晚我嘅三位嘉賓王賢誌（Vinci）、鍾麗淇（Margaret）同埋韓君婷，表面睇好似無咩關係，其實私底下佢哋係好朋友。佢哋近日仲有一個共通點，就係喺佢哋人生中將會展開新嘅一頁，而且都係同健與美有關！Vinci正努力發展健康食品生意，Margaret就會喺暑假推出第一本屬於自己嘅瑜伽著作，而君婷近日亦新聞多多，究竟咩嘢葫蘆賣咩藥？等佢哋自己表白。

飯局金句：Forget the Past！

韓君婷係選美出身，王賢誌搞緊健康食品，加埋星級瑜伽導師鍾麗淇，真係健康與美麗並重。	Margaret嘅瑜伽著作將會喺暑假推出，佢一星期keep住練四日瑜伽，呢個動作只係濕濕碎啦！

世上無難事

今晚我揀咗銅鑼灣珀麗酒店嘅心軒中菜廳嚟開飯局，因為君婷同Margaret都係鬼妹仔，又係第一次同佢哋見面，所以我想介紹一啲新派中菜畀佢哋試吓。雖然飯局喺夜晚，但係我特別安排咗蝦餃同皮蛋燒鵝酥呢兩款點心，畀佢哋試吓，Margaret一見到個蝦餃就好開心，「如果一世人只可以食一種食物，我一定會揀蝦餃！因為真係好好味呀！」呢度嘅蝦餃入面包咗三隻鳳尾蝦，但只係賣$18一粒，一人一籠，賣相好精緻。

Margaret自從淡出娛樂圈，就專心做瑜伽導師，但原來佢以前曾經好憎瑜伽，「我第一次學Yoga係同湯盈盈一齊，我嘅筋骨好硬，所以好多動作都做唔到，但身旁嘅湯盈盈好輕易就做到，仲好得戚咁望住我，嗰一刻我同自己講：『I hate Yoga！』」Margaret喺十四歲嘅時候撞過車，拉傷咗背部，所以好少做運動。佢仲話自己以前係石頭人，筋骨硬到不得了，但當佢了解到瑜伽可以治療舊患、改善心理狀況，佢就開始學習，更慢慢愛上。

「其實做瑜伽可以反映你嘅生活態度，心急嘅人會好想快啲做到某啲動作，有啲人又會夾硬做，其實只要畀心機，循序漸進，每個人都可以做到。

「嚟緊暑假，我會出版一本瑜伽書，裏面會有DVD，大家可以跟住嚟做。」Margaret透過不斷進修同練習，令自己由「石頭人」變成「橡筋人」，佢嘅經歷話我知，世上無難事，只怕有心人。

Margaret喺外國長大，中文唔係咁好，曾經因為咁樣鬧過笑話，「我教學生呼吸法，叫佢哋膨脹個『排骨』，過咗好耐先有人糾正我，原來係『肋骨』！」

又型又瀟灑

同樣近年較少喺電視出現嘅Vinci，呢排就以健康食品公司老闆嘅身份，同四哥現身喺各大報章雜誌，推廣養生保健品。Vinci話，「我嘅家族同四哥一家識咗好耐，當時想搵代言人，我就諗起四哥，佢廿幾年無拍廣告，我起初都擔心佢唔肯，直至佢親身試過我隻產品，就即刻答應。」四哥試食三個月之後，覺得身體好咗，仲將隻產品介紹畀佢媽媽。

其實Vinci細個時係同四哥住喺同一幢樓，佢仲同我分享咗一件趣事，「有一日，四哥拍完古裝劇，着住套清裝返屋企食午飯，我阿媽喺樓下見到四哥，初時以為自己撞鬼呀，哈哈！」今次搵到四哥做代言人，Vinci除咗感激，仲有欣賞，「四哥對人生係好積極，佢覺得最緊要開心同自由。」我都同四哥做過訪問，佢真係一個好型又好瀟灑嘅人，佢同我仲有相同睇法，就係「forget about the past」！

呢個時候，侍應為我哋送上一道沙律芝麻蝦，Vinci見到就話呢道菜喺以前清水灣道TVB canteen都好出名，食咗一隻之後就話，「同TVB有得揮。」自從離開咗TVB之後，Vinci嘅工作無停過，間中會做司儀，拍下廣告，其餘時間就幫爸爸打理生意，而健康食品就係委派畀佢嘅重任，「爸爸○二年做東華主席時，為中醫藥服務做咗好多嘢，嗰時開始佢就想發展中醫藥業。」Vinci隻保健藥品叫古漢養生精，喺國內有唔錯嘅口碑，「四月大家就可以睇到我同四哥一齊去到湖南參觀藥廠嘅情況喇！」

Vinci雖然從商，但間中仍會接些司儀嘅工作，滿足佢嘅表演慾。「以前全職做幕前，睇見別人做節目，就會好留意人哋不足嘅地方，依家反而識得欣賞別人嘅風格。」	Vinci自認酒齡好淺，但今晚見我同Vinci飲得咁開心，我又搵到新酒腳喇！

只許勝，不許敗

今晚多得Vinci，我先可以認識到君婷，選美冠軍出身嘅君婷，有一副外國人面孔，但係以上兩個因素，並無為佢開出一條康莊平坦嘅星途，「我條路比較大上大落，但係一路我都好珍惜每個機會。」君婷話當初由佢決定參加選美嗰一刻，佢就朝住冠軍嘅目標進發，入咗娛樂圈，佢仍然抱住「只許勝，不許敗」嘅心態。雖然曾經有人批評過佢嘅身材，又有人話佢嘅鬼妹樣唔入屋，但佢一路都無放棄。但直至兩年前，佢覺得對前途有啲迷茫，所以決定停工，慢慢諗清楚條路應該點行。

休息兩年之後，佢又再次振作起來。眼前嘅君婷好有自信，亦唔會對別人嘅批評而上心。Vinci話其實係佢間接令君婷復出，「當時亞視搵我做《選美風雲》主持，點知原來仲有幾日就開鏡，佢哋想搵個選過美嘅靚女同我拍檔，於是我就諗起君婷，咁啱佢又休息完，所以我算係間接令佢復出㗎！」一齊做完主持之後，Vinci代言嘅直銷中心廣告想搵女主角，君婷就繼續同佢拍住上。

傾到咁上下，師傅推咗一道稻草牛西施入嚟，未食已經聞到好香嘅稻草味，剪開咗啲稻草之後，大家就急不及待試吓，君婷大呼好味，「啲牛肉好腍，好入味呀！」原來呢一道稻草牛西施喺心軒開業嘅時候已經有，係一道長青招牌菜嚟㗎。

今晚我聽咗三個故事，唔同嘅前因，引出未知嘅結果，但有一樣共通嘅就係，forget the past，明天先重要！共勉之！

Vinci曾經搵君婷一齊拍檔做《選美風雲》節目主持，間接令佢復出，之後一齊拍廣告更變成好朋友。	君婷視演員為終身職業，所以一有機會就會豁出去，實在勇氣可嘉！