名人飯局 只值一萬
記者協會（簡稱記協）今年籌募經費嘅一個新嘗試，就係競投近期業績「見紅」嘅《壹傳媒》老細黎智英搞嘅飯局。模式就好似股神畢菲特每年舉辦嘅飯局，讓啲仰慕股神，或者想向股神取經嘅人士同畢菲特食飯，但名額只有一位；有興趣者透過網上競投，價高者得，過去成交價隨時要兩百萬美金，股神會將啲錢捐去做善事。
呢個港版飯局，喺肥佬黎屋企舉行，為顯矜貴，記協一早講明，只得六個名額，每位底價一萬銀，價高者得。
一言有位老友收到記協邀請信，佢心諗自己都係小人物，竟然收到邀請，自然受寵若驚，而且話晒係記協搞，心諗點都要畀吓面，咪象徵式出價，於是以底價一萬元競投。老友原本諗，肥佬黎都幾有名氣，只落一萬銀，照理應該唔會中，點知後來記協通知佢入選，老友都打個突。
以底價競投都可以中，即係冇人爭喇，據記協公布呢項活動籌款數字，合共籌得七萬五千銀，睇怕與會者都係抱住試試心態，唔少人都係落一萬蚊標，根本無預計可以出席飯局。
其實多啲少啲錢唔緊要，最緊要學唔學到嘢，老友就跟一言講，查實個飯局冇乜特別得着，佢自己都係當作識個朋友咋。
