邊緣青年，是陳偉霆對過去的自己所下的定位。其實，「言重」了。

今天，有小學生加入黑社會，十四歲可以當媽媽，中學生把連鎖咖啡店的沙發作陽台，年已廿五、六歲青年的藝人還涉嫌藏毒，被扣留國外，全城轟動。而四年前的陳偉霆，「只是」在當選新秀冠軍後，迷失方向，夜不歸家，沉迷打機夾band跳舞，再自困band房藏身朋友家瞓文化中心。那，又有幾「大件事」呢？

「阿哥喊呀！由細到大，我從未見過佢喊。但阿哥怕我會一直頹廢，喊住勸我振作。真係好感動！覺得自己應該要做點成績出來，所以努力健身增肥，又學跳舞。之後，就有機會加入Sun Boyz，再個人發展……」

兄弟同心，其利斷金。何況，當事人自小生活富裕無憂，身為家中幼子，母親兄姊愛錫是必然，只要迷途知返，立時變回幸福小王子。更別提，他六年前已認識「口靚界女神」AngelaBaby，一起行街食飯是閒事，早前又掃盡各大樂壇頒獎的新人金獎，恨死一眾宅男與同業。

「頒獎禮後，我有祈禱，話畀老竇聽，自己終於攞獎……」幸福，從來都不是必然，無論你是邊青，或王子。

反叛

第一次見面，便感覺陳偉霆比同年齡的男孩成熟，說話慢條斯理。拍照時，為找出最佳角度，他二話不說，做了不下二十次單手倒立。事後，這個「新人王」才說因感冒關係，要趕往求醫。我還以為，廿三歲的後生仔，多少會帶點年少輕狂，或許更反叛一點。

「其實，中二、三時，爸爸過身幾年後，我已經試過反叛。那時忽然覺得自己無老竇管，即係冇王管，諗嘢好反叛！當然，唔係嚴重到要犯法，只係跟同學相處時，態度好寸，又試過唔返學，走去打機。最後畀人發現，阿Sir打電話去屋企搵阿媽。我就訛稱佢出街買餸，之後掹了電話線。誰知，屋企原來有五部電話，一不做二不休，我掹了所有線。結果，連家姐阿哥都打唔到電話返屋企。到他們放工回來，自然發現我做的好事。阿媽、家姐、阿哥就輪住打！

「其實，我屋企的家教真係幾嚴，因為阿媽以前會落disco，即係去蒲！所以，佢好明白世途險惡，經常話以前阿媽無管佢，所以佢更加要管教好我們幾姊弟。不過，從小到大，我對讀書，始終不算有很大興趣，成績唔太差，又唔太好，會考十一分，中規中矩。反而，我受阿媽影響，鍾意跳舞。因為佢經常睇郭富城同ＭＪ（Michael Jackson）的ＭＶ，我自細就覺得跳舞好有型！長大之後，仲發現跳舞可以帶畀我好多諗唔到的榮耀。」

加入Sun Boyz兩年，陳偉霆（左）自言Steven（中）和Dennis（右）對他很好，現在雖然分開發展，仍以兄弟相稱。

○三年「新秀」中，只有陳偉霆和鄧穎芝還為人熟識。難怪前者當年跟師姐Yumiko共舞時，充滿自信。

小時候的陳偉霆一臉傲氣。「我由細到大，個樣都係咁，所以好多同學覺得我好寸。」

頹廢

0

陳偉霆天生身高腿長，本就是學舞的好材料，再加上「家學淵源」，而且「跳舞易識女仔」！那，還要考慮嗎？當然，全力向舞王之路進發，此志不渝。

「中學時，我讀St Joseph（聖約瑟英文書院），男校生無機會識女仔。但我做舞蹈學會會長，同真光女校一齊搞聯校ball，每次都留五分鐘畀自己獨舞，一落台就有女仔想識我，好有自信！」政府應該考慮在新界北多建幾所舞蹈學校的，花力氣去跳舞識女仔，總好過集體索Ｋ，滿街邊青。

「其實，○三年參加『新秀』，都係諗住去攞『勁舞台風演繹獎』，因為我知自己唱歌難聽，Mani有次上youtube睇番段片，都笑我唔知唱乜！」但，有些人天生就比別人幸運，為跳舞而參選「新秀」的當事人，竟然連中三元，拿了「金咪大獎」、「勁舞台風演繹獎」和「自我才華表演獎」。「讀完中五，阿媽本來諗住送我去美國留學，但佢應承我，如果贏『新秀』就可以唔走，轉去國際學校讀書。」

只是，快樂過後，往往是黑暗的開始。「加入公司，最初兩年，無碟出，無所事事（最值得記住的，大概只有○三年和AngelaBaby主持《迪士尼開心星期六》，種下女神良緣！）。我覺得公司唔畀機會，但就無諗過自己唔夠料。結果，讀完兩年國際學校，無再升學，又無工作，開始頹廢一年。好唔開心，日日出街玩，唔返屋企，夾band打機跳舞，一班人一齊『hea』，無人生目標。阿媽話都無用，直至阿哥對住我喊……」

突圍

事實上，陳偉霆的年紀和兄姊相距甚遠，所以自小得到家中各人愛錫，除了小時候偶爾因頑皮，要受點「皮肉之苦」，基本上是要風得風，要雨得雨，沒經歷過挫折！「長兄為父，阿哥覺得自己有責任去教番好我。所以佢用一萬蚊兩個月，請私人健身教練操fit我。當時，一日食十幾隻蛋，day day做gym兩、三個鐘，再正正經經學跳舞，狂操半年，跟住就去搵Mani！」

操到有一百五十八磅，從「排骨仔」變身「大隻男」的當事人，就這樣一鼓作氣地拿着拍下個人獨舞的錄影帶，走上英皇辦公室找經理人。「你知Mani好忙，佢話等陣先睇，但我唔理，走入隔籬房，開着電視播帶，再扯Mani埋去睇！佢睇完好開心，覺得我真係做到成績，跟住畀我加入Sun Boyz。」

眾所周知，從Boyz到Sun Boyz，都是英皇培育少男偶像的試金石。從前，有關智斌通過考驗，離開組合，獨立發展。而肯捱肯搏的陳偉霆，趁着樂壇上跳舞歌手青黃不接，順利成為另一個幸運兒，於○八年推出個人唱片，更輕易成為四大樂壇頒獎禮的「新人王」，終於吐氣揚眉。

女神

「其實，我只係有少少成績，而且知道所有嘢都得來不易！去年尾，我同時拍麥兆輝的《竊聽風雲》同埋彭發的《玩大咗》，試過三、四日無瞓覺，諗唔到嘢，喪屍一樣！同事有時要拍醒我去開工，自己坐車時又唔敢瞓，怕醒番仲辛苦。

「最記得有次三日無瞓覺，但要去做school show，跳舞之餘，仲要單手倒立。相信個動作係有史以來hold得最耐，因為我倒立後，整個人停咗三、四秒！事後，同事仲話，原來你唔夠瞓，跳舞勁好多喎！

「講到尾，我都情願有得忙，好過無嘢做。雖然忙的時候，我會呻，猛問點解唔畀人瞓覺？但男人始終事業為重，至少要用五至十年去衝。」那AngelaBaby呢？「佢係好女仔，人靚又心地好，今年新年阿媽仲畀佢一封大利是，叫我努力去追！我鍾意運動型女仔，如果佢曬黑都OK。」不是說要專心工作？「不過，我無話唔可以拍拖呀！只要合眼緣就可以考慮……」沒錯。緋聞女友是「o靚界女神」，說出來不失禮之餘，又可以情侶檔姿態接騷搵真銀，多闢財路。

忘了告訴你，陳氏一家皆從商，而自言讀書頗「hea」的陳偉霆，會考成績最好的科目是經濟，攞Ｃ。除了跳舞，應該都精於計數。

二十歲的AngelaBaby跟廿三歲的陳偉霆，識於微時，郎才女貌，難怪陳媽媽會叫乖仔追貼一點。

盛傳「女新人王」G.E.M.拍戲時，常偷望拍檔陳偉霆。「梗係無，大家一早識，佢係朋友的朋友，一齊唱過K。佢十七歲咋！係小朋友。」

祈禱之後

當大家在剛過去的清明節，排隊上山，攞齊冥鏹燒豬白切雞，來到先人墓前，慎終追遠時，陳偉霆告訴我，他跟亡父，有另一套「溝通方式」。

「老竇在我十一歲時過世，記憶已經唔多。記得佢鍾意踢波（陳父為職業足球員），會帶我一齊去球場玩。所以，我唔會覺得老竇睇唔到自己攞獎，係一種遺憾。因為，佢一定估唔到我會跳舞，仲攞獎。而且，我相信人死後，靈魂都仍然會存在。我們一家信天主教的，覺得唔一定要去墓前先傾到偈，屋企有老竇張相，我會祈禱話佢聽，自己發生的事。

「其實，老竇早死，我知道阿媽、家姐、阿哥好辛苦養大我，所以依家最緊要要畀心機做嘢，自己係時候要回報……」

逝者已去，來者可追。幸福，非必然，但可以爭取。

勇奪「叱咤」男新人金獎時，激動落淚，「我知有雜誌話我『谷』眼淚，不過我唔理，總之台上有三分鐘係屬於自己，我要多謝晒一直支持自己的屋企人、朋友、同事！」當年的邊青，早變得硬淨成熟，陳爸爸該可放心了。