為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 留星語 2011 年 07 月 01 日

焉知非福 陳敏之

因為一齣《怒火街頭》,因為一個「一樓一鳳」的角色,因為一場街上裸跑的戲,Sharon陳敏之最近成為了網民熱話,既被封為「索腿天后」,又在討論區紛紛留言戥她在劇中的經歷可憐,上周四「貞貞」被石修扑死後,更有網民開post悼念。

人氣爆燈,當事人坦言,這是她始料不及的。「這個角色一點也不討好,本來我估計反應只是普通冇乜特別,甚至宣傳時都未必會談論到我,所以,有這樣的反應,我真係覺得好意外!」

感到意外,只因Sharon去年並不好過:先是年初拍《公主嫁到》時,因頭飾過重導致頸椎移位;接着是拍《怒》劇的「裸跑」戲時,一個跌倒,左邊身硬碰坑渠蓋,撞斷鎖骨,需即時停工;到年底時,她又發現自己整個人忽然腫脹兼呼吸困難,一驗之下,才知患上了腎炎,更有少少肺積水,令她不能不休養三個月。

大病初癒後,她說整個人彷彿對生活或人生有了不同的啟發。「以前我會死做爛做,工作、搵錢都第一。依家?身體最緊要!個人諗嘢會豁達咗,冇以前咁緊張個收穫或觀眾嘅反應。然後我發現,原來平常心去面對一些事情,反而會有更多更大的surprise!」

塞翁失馬,焉知非福,上天給予人一些看來壞的經歷,實情都是為了即將來臨的好機會作一個預備——這點,三十二歲的Sharon今天似乎已經有所領悟了。

還未嫁

人逢喜事精神爽,多年來把感情事低調處理的陳敏之,近日接受傳媒專訪時,竟少有地主動提及拍拖六年、年長她七歲的燈飾商人男友William,更有報道說,因為Sharon早前大病時,得到男友幫她沖涼,令她大為感動,有可能隨時嫁給對方。

佢(William)幫我沖涼係真嘅,咁斷咗鎖骨,成隻左手都郁唔到,工人都有幫我沖嘅,但講真,沖涼呢啲嘢,男朋友會方便啲囉。其實邊個屋企人有事,你都會願意同佢沖涼啦,係咪?

至於話結婚,一定唔係依家,起碼係幾年後嘅事,我依家大病初癒,唔會無端端搞啲咁辛苦嘅嘢囉!大佬,一個婚禮真係好鬼攰o架!而且,佢知道我哋做呢行嘅人都會比較遲婚,同埋我哋都係工作狂,大家都覺得,到咗適當時候,或者想生BB時咪結囉。

我哋依家嘅狀況可以話係平淡,不過講到尾,最重要係溝通到!呢方面,佢年紀比我大會係好啲嘅,我亦都想趁呢個機會,多謝佢喺我病嘅時候好照顧我,一直喺我身邊扶持我,佢原來好好、好細心,我對佢加晒分,但我從來都冇話過要結婚,呢啲只係傳媒嘅意願啫,不過唔緊要啦!

因為一雙美腿,令Sharon得到不少廣告商的青睞。

去年跟少年食神(中間)拍《為食一條街》時,Sharon(左二)已開始整個人水腫,後來檢查後才知得了腎炎兼肺積水,即時停工休養三個月。

代表作

一場大病,除了看到男友的好,亦令Sharon對於最近因為《怒》劇的「索腿天后」成了網民熱話感受良多。她謙稱,《怒》劇不過是她的一個代表作,並非事業高峰。

以前啲人問我有冇一套劇作最滿意或代表作,我咁多年嚟都答唔到,因為真係冇!始終代表作唔係我做得好唔好,而係最令觀眾有印象!

監製今次安排我做一樓一鳳嘅角色,我真係好興奮!因為我一直都想試演性工作者,想演繹佢哋嘅女性心態。我冇諗過,依家出到嚟,竟然起咗啲化學作用,有啲網民話,邊度有咁靚嘅一樓一呀?但老實講,觀眾個個都想睇靚嘢o架啦,係咪?然後,依家好多人一見到我,就會好記得「索腿天后」,即使個角色本來一啲都唔討好,但觀眾冇抗拒我之餘,仲完全鍾意咗我!真係令我好開心o架

《怒火街頭》的一樓一「貞貞」,在街上「裸跑」戲,令她跌斷鎖骨,最後卻成了宣傳重點,Sharon笑說:「都算跌得好欣慰!」

老實講,我喺TVB咁多年嚟,公司一直都好照顧我,對我好好,開心嘅日子居多,我從來冇諗過離巢,亦都冇資格!我唔似好多前輩咁,有咁多代表作,可以喺出面搵到食,喺出面我乜都唔識,風大雨大,點都係公司安全啲囉,離巢呢個問題,對我嚟講太遠啦!

冇錯,自○六年起,我每年都有提名,不過從來冇攞過任何獎。但我病癒後其實已經冇咁在意獎項呢啲嘢,依家你問我想唔想要,我會答你,真係有一個作為留念都好,不過就算攞唔到,我都只會唔開心一段短時間,呢間公司對我咁好,我只會諗點樣可以繼續做好啲,就算公司安排我做人哋阿媽、做甘草,我都唔介意囉!

由於斷了鎖骨關係,「裸跑」戲份由替身頂上。

幾百蚊

對TVB滿懷感激,看得出來那並不是擦鞋話,皆因,當年在Sharon的演藝路上最迷惘、最山窮水盡時,TVB的一張藝員合約,可說成為了她的曙光!

我十四歲就出嚟做model,簽咗小室哲哉後,隻碟出唔到街嘅時候,係我最迷惘時期,唔知自己想做乜。當時我媽咪都有做嘢,但我仲有個細佬,屋企有好多開支,父母佢哋負擔好大,我又慣咗自己照顧自己,唔想靠屋企,所以我都要諗應該搵份乜嘢工做呢?

其實我做model時都有儲落少少錢,但後來轉咗做歌手後,我就用晒啲錢去買衫,剩番嘅,咪喺我冇job又冇收入時慢慢搣囉,又唔敢買嘢,但好搞笑o架,絕處又會逢生o架喎,當時每到銀行只得幾百蚊,就自然會有啲job做吓,吊住你命咁,又未死得喎!

嗰陣窮到得幾百蚊時,老實講句,嗰個月連食飯都有問題,每日我等到餓先去麥當勞度買兩個三、四蚊嘅漢堡包,嘢都唔飲就做一餐,夜晚就食公仔麵;當時唔係要做嘢,都唔會出街,就算係做嘢,都淨係搭地鐵,或者行到去嘅都會行。

所以當簽到TVB,知道會有穩定嘅人工後,我已經好開心,知道唔係絕路、唔使憂柴憂米,我真係好想多謝呢間公司幫咗我好多,日後生活愈嚟愈好,又幫我搞掂晒屋企經濟上嘅嘢,咁好老實,有邊份工好得過呢份呢?

初入TVB時,Sharon承認人工不多,但開始脫離窮困期,終於見到曙光了。

跟葉佩雯(中)和Zoie(右),當年齊齊都是小室哲哉挑選出來的徒弟,誰料最後卻連唱片也出不成。

屋企人

Sharon的家庭環境雖不算富有,但猶幸跟父母和弟弟一家四口相處融洽。○三年,她的父親離世後,Sharon便成了一家的經濟支柱,這幾年,她除了為母親置業外,更供養細佬入讀大學。

阿爸死咗之後,阿媽係最重要嗰個,我同佢不嬲都好close,呢次我病,更加唔使講,佢簡直照顧到我無微不至!

反而我最估唔到嘅係,因為我一場病,我同我細佬啲關係friend咗好多!佢細我六年,同一般嘅青少年咁,好少同屋企人溝通,返到屋企就食飯、打電腦,好收埋自己。但我病嘅時候,佢就好乖,我入醫院時,佢每日都有嚟探我,佢知我鍾意Winnie the Poon,就買啲好得意嘅嘢食嚟o氹我,好似當我三歲咁;到我出咗院,又會擔心我冇飯食,聽到我話唔想食,就會好緊張,問要唔要買畀我……其實呢個病之後,可以話將我同細佬啲感情拉近咗,好似friend咁,依家我哋會成日message對方,同以前好唔同。

六歲時的Sharon,當時仍未做家姐,是父母的掌上明珠。

因長得高,樣子又較同年的成熟,十四歲讀書時期已開始當model。

白腿興家

「索腿天后」、「索腿天后」,陳敏之的一雙修長美腿,多年來都是她的賣點,但吊詭的是,腳長吋數經常遊走於四十一至四十三吋。「係四十三先啱!四十一就一定錯,四十二吋呢,係我做model時,自己亂咁度出嚟,後來有專業人士幫我度,先話我知,其實我有四十三吋腳長。」

她不諱言,對於多年來人們經常談論她的長腿,是有些少煩厭的。「講真,嗰陣我未有乜嘢代表作,我唔想人哋淨係記得我對腳,都想人哋多啲留意吓我演技;到依家終於有代表作啦,我冇諗過都係因為條長腿,證明佢好使得!我應該要鍾意佢!

「好老實,呢行點都要搵啲特別嘅嘢去引人注目,先會有人慢慢留意到你其他嘢囉。依家我先識諗,我真係靠呢雙腿,先可以撐起頭家咁多年!冇咗呢雙腿,我就養唔到屋企,佢個地位,仲緊要過我自己!哈哈哈!」

單靠一雙腿,可以買起維景灣畔一個九百呎單位(她母親的居所),又可以買到一輛黑色Harrier做座駕代步,照計,下次甚麼企業家雜誌,應該要找她的腿做訪問。