已故城中富豪兼馬主明嘉福長子明肇豐，大有本錢玩林寶堅尼、法拉利等超級跑車，但他由細到大卻偏偏鍾情價值數十萬元的四驅車，貪其在野外泥濘、崎嶇山路飛馳，倍添刺激。近來每次車會聚會，明肇豐更帶同六歲的兒子子傑一起出席，令兒子亦漸漸愛上野外奔馳的樂趣。

上周日，晨早八點半，明肇豐又帶着兒子，駕着價值五十萬的Land Rover六十周年限量版四驅車，參加Land Rover Club的morning drive。明肇豐說：「個仔平日返學，好少機會去郊外活動，之前帶佢參加過一次morning drive，之後佢就成日問我，「爹哋，我哋幾時再去遊車河呀？」

俯首甘為孺子牛，明肇豐坦言只要兒子快樂，再早起牀也值得。

攀山越嶺

清晨八點半，十二架Land Rover四驅車浩浩蕩蕩駛進沙田馬場的天幕集合。當日明肇豐帶埋六歲的兒子子傑同來，甫抵埗，子傑興致勃勃下車，逐一欣賞在場的每一架四驅車，明肇豐笑言：「兩、三年前，經車行的人介紹加入這個會，佢哋每個月有兩、三次活動，但我成日唔喺香港，通常每個月只能出席一次，我鍾意Jeep，參加車會令我學會享受大自然。」

明肇豐隨車隊浩浩蕩蕩由沙田出發，到沙頭角的木徑山，子傑精神奕奕，見到靚風景又會嚷着叫爸爸一齊看，明肇豐同兒子邊講邊笑，輕鬆地駕駛着的四驅車在崎嶇不平的山路馳騁，攀上到香港境內東北最高之山，海拔492米的紅花嶺，同車的記者受不住顛簸的車程，搞到頭暈眼花。下車時，看見車身和軚沾上不少泥濘，明肇豐說：「咁玩法就預咗架車會污糟和刮花，有人覺得四驅車唔值錢，是廢鐵垃圾，對我來講是有價值，因為有感情。」

劈樹開路

明肇豐好珍惜同兒子相處的時光。他說：「就算幾忙，早起牀，都會同個仔一齊morning drive。」

明肇豐早在加拿大讀大學的時代，已經是四驅車發燒友，當時擁有Suzuki和Jeep兩架四驅車，一放假，他便約埋朋友練車通山「鏟」。「嗰時玩得好勁，上山行到無路行，就用刀斬開啲樹，玩到架車爛晒，以前鍾意入森林射擊和打獵，架車好多『架生』㗎。」

說穿了是明肇豐喜歡挑戰刺激，身嬌肉貴的他，十六歲走去考電單車牌，連越野電單車都夠膽玩，「我鍾意刺激，以前會揸電單車上山，不過成日食塵，又好似撻生魚咁撻，成身傷晒，後來都是覺得揸四驅較穩陣。」

畢業返香港，身邊班朋友開始轉玩跑車，明肇豐縱使玩過法拉利、林寶堅尼、保時捷等超級跑車。家中現有馬莎拉蒂、Benz跑和豐田電動房車等，但始終不及四驅車來得實用，「我都鍾意跑車，但靚的跑車只得兩門。現在有小朋友，每次出外都好多嘢拎，三個人依家就算外出購物，買到一袋二袋，一架Jeep亦可以一次過擺得晒。」

四驅的車尾箱特大，明肇豐在加拿大揸去超市瘋狂掃貨後，仲有大把位剩。

買車保值

明肇豐玩四驅車玩得刁鑽，非柴油車不玩，他解釋：「部引擎勁至會用油渣，engine大扭力會大好多，我揸慣油渣車，油渣又平，$0.7一公升，用電油要$3一公升。」

自九七年政府停止私家車輛出柴油牌照，明肇豐指黑牌（柴油引擎）的四驅車更加渴市，「四驅車是全球性有價值，我買過咁多架四驅車，賣番出去一定有個價，現在攞架車去車房整，成日都有人問我有無興趣讓畀佢，我買過樓，買過法拉利，賣番出去，樣樣乜都蝕一半錢，但四驅車個二手價就企得好硬。」

明肇豐約三年前參加Land Rover Club，會員大多是校長、醫生和商人等，玩得比較斯文。

六十周年限量版的Land Rover，價值$50萬，全港不多於十部，早前Land Rover 60周年活動，明肇豐借出此車作展覽。

獨愛限量

明肇豐現擁有十四部四驅車，牌子分別是Benz G系、凌志、豐田、Land Rover、福士和Audi，他習慣香港有的車，在加拿大會買多架同款同型號，以便適應，「用過可以放心用，在加拿大用來爬山和滑雪。」

明肇豐自言只對限量版四驅車有興趣，市面上要愈少愈好，當日他所駕的正是Land Rover Defender 60周年的SVS版，價值五十萬，全港不多於十架，另一架是Columbia版，價值五十五萬，全港亦不多於二十部，問他為何可以輕易買到限量版車？明肇豐笑笑口說：「相熟的車行經理每次有新車返，都會主動打電話來問要唔要，要就幫我留貨。」

珍藏大玩具

明肇豐揸凌志LC80在加拿大穿州過省，上山落斜，好似行平路咁easy。	明肇豐年前以十多萬買了一架豐田農夫車，經常相約新界區的村長上山「片」車，貪其任撞任鏟亦唔肉痛。

凌志LX470有車身升高功能，明肇豐新車落地，特別走去元朗試車。