為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2011 年 06 月 07 日

「派錢」方法初定 8.28登記 銀行禮拜開門

財爺派錢六千大元,個個有份,但點派法,幾時派,至今仍未公布,市民都等到頸都長。小弟打聽後得知,政府已初步決定於八月二十八日進行登記,當天係禮拜日,但銀行都開門收form。點解揀呢日?背後原來有個特別原因。

據知情老友講,政府本來構想,係市民於九月一日開始,到二十幾間銀行登記(網上亦可),填寫身份證號碼及指明用邊個戶口收錢,政府核對冇錯後,大概到十二月初就透過銀行派錢入戶口,市民可攞到六千蚊過快樂聖誕。

市民苦候財爺送六千蚊大禮,經一番研究後,派錢方法及時間已初步定出。

但政府徵詢個別政圈及業界人士意見後,發覺有個問題,就係香港人個個怕蝕底,頭一日登記必然齊齊湧去銀行,特別係班老人家,可能搞到銀行排晒長龍。九月一日係禮拜四,好多人客會使用銀行服務,就算冇呢單嘢,都已極之繁忙,如果加埋大批市民迫入去登記,肯定場面大混亂,職員冇可能應付到,分分鐘搞到群眾鼓噪。

就算冇出亂子,成條隊排到出銀行門口,唔知嘅以為銀行擠提,即call親友去提款,咁就大件事。

呢個問題的確可大可小,政府諗過之後,初步決定提前四日於八月二十八號禮拜日開始登記,由於當日係假期,其他人唔會去幫襯,銀行可以集中人手幫市民登記,老人家有時間問清楚至填form,避免出錯攞唔到錢。

小弟問商界議員林健鋒點睇,佢話咁安排好適當,第一日登記必然墟冚,改在禮拜日做,可以避免亂龍。

首日登記初步安排在禮拜日進行,避開平日繁忙時間,以免銀行出現混亂場面。

禮拜日登記對銀行亦係好事,故銀行方面都會配合,願意為此事特別開多日工。講開又講,今次有二十幾間銀行幫政府派錢,要用大量人手同電腦,涉及嘅行政開支唔少,聽講商議初期,部分銀行有少少扭計,但最後都肯捱義氣幫手。

現居海外嘅香港人,又點攞錢呢?據知呢班港人一樣可以登記,只不過所用嘅戶口,一定要喺香港開,唔可以在唐人街嘅滙豐過數。屆時政府將透過佢哋登記嘅香港戶口派錢。如果冇香港戶口又點?咁就要去郵局登記,遲啲直接寄支票畀佢哋。

另一個傷腦筋問題,係現時差少少至夠十八歲嘅市民,有冇得攞?政府對此有兩個想法,一是八月二十八日開始登記嗰日滿十八歲,就有資格;二是明年三月三十一日前滿十八歲嘅市民,都可以攞。前者係根據登記日期計,後者則寬鬆好多,凡在今個財政年度內夠歲數者都有份,如果用呢個準則,派出嘅錢會多咗。聽講政府仍然諗緊,仲未有最後決定。