舖價九年升五倍 釘子戶鬥贏四叔
上星期四叔李兆基話到明，今年會繼續喺本港積極收購舊樓，依家已經買咗幾個舊樓地盤，但唔會手軟，仍會續吸貨。四叔話，縱然收購難度相對高，但舊樓啲地價較公開賣地要低，最終利潤會較高。
言猶在耳，一言發現早前恒地（0012）為求完成收購一座旺角舊樓，搞到要出雙倍價收購最後一個舖位，個釘子戶業主先肯退讓。話說恒地早於○九年，以兩億三收購旺角界限街強富大廈逾九成業權，當時每伙舊樓單位收購價約莫二百四十萬元，地下舖位亦只八百多萬元。點知有一兩個地舖嘅業主唔肯賣，誓要堅持鬥爭。
恒地見咁情況，作出兩手準備，除申請強拍外，更不斷提高出價利誘業主，花咗兩年時間，終於與最後一個舖位業主傾掂數，收購價由原先八百多萬元，大幅提高至二千七百萬，一個只係得千二呎嘅老舖，位置唔多靚，竟然賣出個天價，不得不佩服業主夠韌力。個業主喺○二年用四百二十五萬買入個舖，十年唔到升值五倍，呢個投資都算十分成功。
強富大廈最後一戶遷出，恒地即刻準備拆樓重建，咁又難怪，收購已經被拖咗兩年。
