為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2011 年 05 月 31 日

政壇高人提絕世好橋 搵范太揸旗搞廿三條

范太造出個勢準備角逐特首寶座,親中元老吳康民又力捧佢做「鐵三角」之首,吹得兩吹,忽然變咗「熱門股」,行情急漲,但套用財經術語,呢隻股唔見得有大後台支持,大家投注前要睇清楚係咪假象。

雖然范太唔認出選,但近排續有動作,日前佢就發出驚人之言,話下屆特首必須為基本法二十三條立法,又強調呢個問題唔係「洪水猛獸」,新一屆政府難以迴避。大家都知二十三條單嘢極之敏感,當年就引發五十萬市民遊行,間接導致董伯落台,范太在此時提出呢個爆炸性議題,自然引起種種揣測。

在一個飯局中,有位挑通眼眉嘅政壇高人第一句就話,范太提出二十三條立法,可能有人以為佢「傳聖旨」,阿爺想借佢把口講,查實並無此事,呢個可能性可以排除,只不過係佢自己噏啫!

政壇高人認為,范太既然咁勇,不如由佢披甲上陣,行頭拆彈擋箭,求仁得仁。

咁范太點解要依家重提二十三條立法?呢位高人分析,佢可能出於善意,建議下届政府早啲拆咗個炸彈,但亦可能立心不良,搬二十三條單嘢出嚟,為下屆特首加添難題,有少少「靠害」性質,就好似燒熱個鑊,放未來特首上去煎。

政圈高人跟住提出一個絕佳建議,既然范太咁勇咁硬,煲呔或者下屆特首應該成立一個「研究二十三條立法專責小組」,委任范太做組長,揸大旗推動二十三條立法。屆時就由佢老人家親自披甲上陣,應付各方進擊,以示佢敢於身先士卒完成二十三條立法嘅偉大使命。范太民望咁高,又係人大常委,如果真有推動二十三條立法之心,應該唔會推辭嘅!

二十三條立法極具爆炸性,○三年就引發五十萬人上街,范太叫下屆特首動手,莫非想靠害?

小弟聽後拍案叫好,認為呢個主意甚「正」,范太講到二十三條立法下届必做不可,好似唔做就冇「吉士」咁,不如就由佢孭起呢個「重大政治任務」,負責行頭拆彈,令佢求仁得仁,鞠躬盡瘁,以身擋箭。呢個建議值得現任同未來特首積極考慮。

講番范太疑似競逐特首,坊間有分析話佢走出嚟參加跑馬仔,目的係砌低振英哥,暗挺唐唐。呢個講法似是而非,向來睇通政情嘅政圈人士就認為,范太想鑽空子坐上寶座,點會幫對手吖,挺自己就真,不過目前形勢仍未明朗,正如吳校長所講,情況「十分之混沌」,范太話要再等兩個月,就係想摸清楚環境再決定下一步策略。

關於吳校長嘅「鐵三角」方案,佢自言係怪論,據小弟了解,佢咁講並非自謙,的確係事實。一位認識吳校長多年嘅朋友講,呢位老人家對自己講完嘢引起熱烈反應,十分之享受,所以久不久就「創作」出驚人言論過吓癮,其實內裏並冇堅料。