為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2011 年 06 月 03 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

有緣不孤單

緣份極之奧妙,我同今晚嘅嘉賓相識多年,佢亦係我嘅好酒腳,但係請佢擔任「金牌飯局」嘅嘉賓,今晚係第一次!劉偉強導演係香港名牌大導之一,喺佢導演筒下有《古惑仔》系列、《風雲》、《無間道》等名作,而劉導新作《不再讓你孤單》就係佢首次開拓感人愛情電影市場,上周四(26日)上畫即贏得一致好評,真係唔簡單!

講到拍《不》片,劉導都係話一字記之曰:「緣」;既然我同劉導今晚有緣相聚,唔孤單之外,佢仲細說事業以外嘅飲食品味。高手出招,絕對要學嘢!

劉導係我嘅好酒腳之一,飯局前一晚佢同太座喺家中大歎30年威士忌,今晚就同我摸住酒杯底又食又傾。

以音樂為本

我今晚挑選咗位於會議展覽中心博覽廣場嘅「金紫荊粵菜廳」,作為同劉導飯局嘅地點,我哋一邊品嘗餐廳總廚何孝源師傅精心炮製嘅粵菜,一邊暢談音樂與電影嘅微妙關係。「我好鍾意用音樂嚟講故事,好多時我都會自製soundtrack,令每一場戲都有一隻歌,咁樣可以令演員、工作人員都易啲入model。我喺拍攝現場都照播住歌,用音樂去帶動演員嘅情緒,經過醞釀後嘅情緒更加真摯。」

聽到劉導以陳昇作品〈不再讓你孤單〉貫穿整部電影,我不得不讚佢高品味!

哈哈哈!高手即係高手,運用音樂嚟牽動演員情緒,要咩mood都事半功倍。今次劉導用陳昇嘅名曲〈不再讓你孤單〉作為貫穿電影嘅歌曲,除咗顯出佢嘅個人品味之外,亦包含其他原因,其實喺寫劇本嘅時候已經揀咗呢首歌,本來都有諗過用其他歌嘅,好似盧冠廷嘅〈陪着你走〉、林子祥嘅〈最愛是誰〉、黃品源嘅〈你怎麼捨得我難過〉等等。後來都係發現呢首歌最啱部戲,啲歌詞同情景融合得好好,而劉燁喺戲入面要自彈自唱,出嚟嘅效果都好touching。

「除咗〈不再讓你孤單〉之外,部戲另外仲有兩首歌,分別係王菀之嘅〈錯過了地址〉同學友嘅〈無聲的結他〉,〈無聲的結他〉即係以前夏韶聲〈結他低泣時〉,我再搵人重新填上國語詞,之後喺拍攝現場不停咁播,威力係非同小可o架。」

鮮茄蟹肉浸莧菜($138)好清新,啱晒入夏時份食用。

紫荊小碟包括5個開胃前菜,可以散點。

杞棗燉響螺($128/位)選用上乘螺頭、老雞、赤肉等,再以慢火燉6小時,夠滋陰。

紅燒花膠扒($98/位)係師傅精挑厚身花膠扒炮製。

一切有安排

劉導所謂嘅威力,係歌曲對女主角舒淇喺拍攝時嘅情緒震撼,「我好多年前已經想拍一部令觀眾喊嘅電影,但係悲劇一般都冇market,所以呢個心願要到完成《游龍戲鳳》之後先可以達成。呢個係一個幾考演員嘅電影,所以我繼續用音樂,等舒淇入mood啲。

「我記得拍ending嗰場戲,要舒淇喊嘅,本身已經拍咗兩三個take,但我之後再拉住佢同佢講:『喂,舒淇唔夠喎。』跟住佢就飲啖水,又可能聽到首歌啦,之後嗰take係拍到我嗌完cut佢都收唔到聲。所以舒淇拍呢部戲嗰時好怕我o架,我明o架,成日要佢唧真眼淚係一件辛苦嘅事,因為咁,佢拍到成日頭痛。」

我同劉導同為惜酒之人,梗係特別啱channel。

女主角為電影付出真感情真淚水,男主角劉燁就係導演感謝緣份嘅「神來之筆」,「男主角一直係令我最頭痛嘅一環,之前傾過一啲演員都唔得,喺我最頭痛之際就撞到劉燁經理人,然後我講完個古仔畀佢聽,交埋份劇本畀佢轉交劉燁,仲特別喺劇本第一頁寫『劉燁,這個故事我想拍很多年,希望我們可一起完成!』

「結果劉燁一揭開,係咁意睇咗之後就爽快話:『行!』,之後所有嘢都好順,因為佢同舒淇合作過,而且拍愛情電影好講男女主角有冇feel,所以兜轉間搵到呢個配搭,我覺得係有緣份帶領一切。」

脆皮玲瓏茶燻乳鴿($68/隻)以乳鴿代替慣常用嘅雞,肉質更加鮮嫩味美。

金盞四季豆鮑魚粒($148/位)選用香草金不換炒南非鮑魚粒,好惹味。

光輝三十年

哈哈哈!講到緣份,真係好多事好多時都一早有安排,大家睇劉導已經有緣為電影業貢獻三十年就知,今年係佢入行三十年嘅里程碑,「有人問我入行咁耐有冇遇過咩挫折,我真係可以thank god,太大嘅挫折係冇,諗咗好耐只係諗到一個低潮,就係沙士嘅時期,嗰時啱啱出嚟自組公司冇幾耐,只係拍咗《無間道Ⅰ》,嗰時日日返公司都要問吓account個銀行戶口有幾多錢,仲要諗唔係拍咗一部戲就收我皮呀?諗番轉頭,嗰段時期都係一個好大嘅考驗,既要睇住公司,又要顧住屋企,我仲有四個仔女吖嘛!」

醬皇白玉蒸斑球($180)係以秘製XO醬輕炒東星斑球,滑不留口。

龍皇金縷衣($238/位)曾獲得「美食之最大賞至高榮譽金獎」,師傅以中東絲包鮮蝦,形味俱全。

我覺得沙士係一個大氣候令業界出現低調啫,當年我就係因此而肩負起令全港人瘋狂開心嘅使命,拍咗《龍咁威》。而劉導成績就有目共睹啦!

不過,唔講唔知,劉導對飲食都有所鑽研,都係高手嚟o架,「以前細個屋企窮,所以我要煮飯,我哋客家人整燜冬菇豬肉OKo架;到大個,搵到啲錢,就學過整鮑魚,初初整嘅時候,叫啲朋友食,鄭伊健嗰啲就話我整咗擦膠鮑魚,硬到食唔到,經過一段摸索期,依家都煮得唔錯嘅。」

劉導(左)同為煮得之人,所以佢同何師傅(右)講起入廚之道,就手舞足蹈。

何師傅(中)為我哋精心炮製醬皇白玉蒸斑球,色香味俱全。

我同劉導惺惺相惜,佢嘅新作大獲好評,我一定要恭喜佢啦!

為子搵師傅

今晚喺緣份巧妙安排之外,我哋以「緣」為題,亦因此而為劉導二子覓得良師,正當我向劉導介紹我全力推介嘅意大利餐廳「Palco」總廚之際,劉導忽然話:「我個仔咁啱要搵意大利廚師拜師學藝做學校project,Paco你不如幫我介紹啦!」

哈哈哈!我自然係義不容辭啦!話畢,劉導就即call劉太「報喜」(左圖),你話呢次仲唔係多得緣份嘅安排?

金紫荊粵菜廳

地址:香港灣仔博覽道一號香港會議展覽中心博覽商場
電話:2582 7728