馮國經原來好專一
利豐 （494）早前宣布主席馮國經明年退休，淡出管理層，隨即惹來各方揣測，曾被視為黑馬嘅佢，會唔會有意參選下屆特首？馮國經向來喺公職王，成日被人讚係「叻人」，有人打佢主意都唔出奇。
一言最近撞到Victor嘅老友，於是八卦吓點解佢咁早退休，老友好有「技巧」咁答：「佢都六十六歲啦，仲細咩？不過佢真係好聰明，喺麻省理工用咗兩年時間就拎埋碩士學位！你話叻唔叻？」
老友仲大爆，話Victor喺美國讀書時，只係追過一次女仔，而且好鬼專一，事關呢位令佢一見鍾情嘅靚女，就係現任馮太沈乃琪。馮太祖籍上海，當時同Victor都喺異鄉，華人特別少，就喺咁擦出愛火花！
Victor馮一直都係利豐嘅靈魂，佢退休，可能係一眾小股東嘅損失。其實佢同另一隻特首黑馬范徐麗泰同樣係一九四五年出世，范太話會考慮參選，唔知同齡嘅Victor馮點諗？
