地產代理 有味字眼招客？
過去大半年受額外印花稅打擊，炒家個個雞飛狗走，冚牌唔玩。無咗炒家撐場，整體二手成交即時插水，加埋銀行連番調高按息，投資者同買家亦轉趨審慎，搞到靠佣開飯嘅經紀無啖好食。
最近網上就流傳一張地產分行用「騎呢」字眼招客嘅相，以為係網民惡搞，怎知一言上個禮拜行過康怡附近，竟然發現利嘉閣太吉樓分行嘅盤架，就係用呢種非常「騎呢」嘅招數搶客。有乜騎呢字眼？「頭文字D」、「青葱歲月」等無厘頭形詞容，部分更嗒落有「味」，例如「野戰首選」、「換套即吉」、「吉到谷底」、「望飛機場」、「唔可以吉」等等睇到人搲晒頭。
究竟地產代理監管局對代理盤架嘅字眼有無監管？一言挑燈夜翻監管局嘅執業手冊，發現只列明「廣告所述的任何特點，例如位置及周圍環境，必須正確無誤。」至於盤架嘅字眼係點怕且地監局都無乜符。
有代理朋友同一言講，話盤架字眼根本無得管，不過佢認為行家過分出位，分分鐘搬石頭砸自己隻腳。「字眼『太創新』，唔係個個客接受到！」
