為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 時事速報 2011 年 06 月 01 日

「有骨氣」變身酒店 月租平到你唔信

「今晚八點、有骨氣!」大D哥梁家輝喺電影《黑社會》一句經典對白,一度令火鍋名店「有骨氣」爆紅,高峰時每月營業額過千萬。不過點樣有骨氣,都敵唔過○八年一場金融海嘯,兩年前全線結業,同時令全幢十二層跑馬地旗艦店一直丟空,過咗兩年先搵到新租客。

一言最近八到,大廈業主客家商會「崇正總會」,同博愛醫院總理黃小雄傾掂數,以每月六十五萬元「跳樓價」,租用全幢八萬呎樓面,計劃改裝成「帆船酒店」——唔喺杜拜帆船酒店,係叫「太平洋帆船酒店」嘅三星級賓館。據聞裝修差唔多完成,有望下個月開業。雖然租金比起「有骨氣」喺沙士時簽嘅租約貴咗成倍,但每呎月租都只係八大蚊,同工廈差唔多。

「有骨氣」位於跑馬地的旗艦店曾經客似雲來,可惜敵唔過金融海嘯,兩年前結業。十二層高嘅大廈快將變身成三星級賓館。

經紀老友話全幢物業加埋嘅租金,比起目前個別灣仔地舖嘅月租仲要平。「蛤乸」當然唔會隨街跳,租期不單止長達五年半,新租客仲要使數百萬進行改裝,兼負責將崇正總會嘅會館由九樓搬到四樓。不過一間酒店月租六十五萬,聽落好似幾抵玩。

講開崇正總會,佢哋呢個跑馬地摩利臣山物業,早年曾經係已故北京大學校長蔡元培在港定居時嘅臨時居所,物業因為極具紀念價值,總會揸住超過八十年都唔肯賣。由於物業樓面多達八萬呎,總會又一直只肯租畀單一用家,所以唔係咁易搵到租客,多數都係租畀大型食肆,好似「有骨氣」嘅上一手租客,就係「福興火鍋」。

「有骨氣」老闆范展鵬○三年創辦有骨氣火鍋,短短兩年擴展至兩幢共十六層樓面店舖,還贊助過得獎電影《黑社會》。